月巴事 - 月巴氏
2014-11-12

免責聲明：這一篇不是《星際啟示錄》影評。基於文章內容涉及少少劇情，如果你仲未睇而又諗住睇兼且平生最憎被劇透，建議唔好睇住。 愛因斯坦與我的前塵往事 實不相瞞，作為文科生的我是一個物理迷(至於迷紅姑多啲還是迷物理多啲？這不是一個物理問題)。 我迷的物理，是理論物理學，即現實未必做到但理論上可行的那種。我細細個已經睇過愛因斯坦的《相對論》——漫畫版。讀後感是：一個深邃的物理學理論，絕對不會因為用cutie漫畫來表述而變得淺咗，所以，我睇唔明。 但我相信，只要高中升讀理科，總有一日我會睇得明愛因斯坦。 偏偏，中三時那個姓黃的物理科阿sir完美地摧毀了我對物理的熱忱——我完全唔知佢教乜，每一堂我都唔知佢教乜，簡單到駁電路板整摩打，明明照住佢講的方法去整，點知一駁上electricity，My摩打竟然勁到飛咗出街！ 中三大考，我數學科化學科生物科成績都很OK，唯獨物理很不OK，肥咗。試問一個物理肥咗的月巴怎樣說服校方俾佢讀理科？惟有揀文科囉。 但我依然情傾物理。一有時間，就捉住理科班同學傾黑洞蟲洞宇宙邊緣平行宇宙種種生人勿近的話題……我甚至話：如果有日NASA邀請我單拖乘搭太空船飛去搵宇宙邊緣，我必定應承。但如果是陪同某女歌星上太空唱中文歌呢我就……… 你帶的不是Anne Hathaway而是梁錦……… 結果，事隔多年，NASA停止了太空計劃，我繼續腳踏實地的在HK原地踏步。所以當知道Nolan的《星際啟示錄》大玩黑洞蟲洞四五次元，立即仆去睇。戲好唔好睇，不在討論範圍，但裡頭那位在太空站孤獨守候廿幾年的黑人，真的令我欲哭無淚。 如果你睇咗戲，應該知道該名黑人的遭遇：主角們去了一個星球探測，那星球的時間運行比起地球慢上N倍，山中方一日世上已千年，當主角們只是留咗陣，單拖留守太空站的黑人已經乾等了廿幾年……返地球又唔得死咗去又太灰，於是潛心研究黑洞(反正成個黑洞就在佢面前)；直至有一天，(依然後生靚仔的)主角們突然返來，黑人呢，老了……… 黑人的下場大家都知道。他明明付出時間心力研究黑洞，但世人會記得和感激的，只是(依然後生靚仔的)主角。黑人，死咗都冇人理——事實上，我真的記唔到他在戲中的名字。 2014年11月，當我目睹別來無恙的董伯伯高調地行番出來，突然有種感覺：我根本就是那個黑人。 自從2005年3月董伯伯以健康為由請辭後，(我以為)他恍如徹底消失了——至少之後每一天會引致我哭笑不得、篤眼篤鼻、連環爆粗的人肯定不是他。然後，接近十年過去，我依然在這地方默默守候努力捱過每一天，董伯伯呢，我唔知呀…… 點知你失驚無神地又出現。而你又不像《星際啟示錄》主角咁體貼地帶埋Anne Hathaway返來，你帶的，竟然是梁．錦．松。OK，你有自由帶邊個出來撐邊個上台，但你那一句自己成日都用腦，真的傷透我心——咁即係點？以前唔係成日用？定隔日先用？嗚吖………Why我只能注定做那個死命守候捱時間度過的黑人？Why多年不在場的你卻能突然以智慧老人姿態親率智庫做好香港？而我更想知道的是，你任內提出的各項偉大建設其實起晒喺邊？另一個平行宇宙內的香港？要我們穿越蟲洞、抑或去到神秘的第五次元先見到？ 物理學話我知，時間只會一直向前走，這一刻的我卻有Back to 2003的感慨。 感慨的我謹以一首詩作結：「有個名叫香港的女孩，她跑得比光速還快。她跑了一天，以一個相對的方式，結果返咗去噚晚………」 (註：詩不是我作的，是改自英國真菌學家Arthur Henry Reginald Buller寫於1923年的五行打油詩，用來暗寸相對論的：There was a young lady girl named Bright / Whose speed was far faster than light / She traveled one day / In a relative way / And returned on the previous night) 撰文：月巴氏 facebook專頁： https://www.facebook.com/fatmoonba blog：http://fatmoonba.blogspot.com/ email：fatmoonba@yahoo.com.hk

2014-11-05

免責聲明：這一篇不是《點對點》影評。   對於《點對點》 你可以提出好多質疑 1.Why一個對香港過去咁有感情的主角會被安排成回流人士？ 2.Why呢個回流人士生活咁中產咁優質？ 3.Why在office主動媾陳豪的女同事被設定為一個港女特質完美綜合體？ 4.Why戲裡唯一能夠拆解點點圖的竟然是一個新來港大陸女子？ 5.Why這一個大陸女子是如此脫俗出塵(而不是趕去買包包撲奶粉兼大肆搜購化妝品)？ 6.Why港女綜合體就需要不能免俗地戴上狀似曱甴腳的假眼睫毛兼打出大殺傷力乳溝？ 7.Why大陸女子由頭到尾都恍如只會在無印廣告中出現的氣質女子？(這是朋友的形容) 8.Why點點圖最初要畫在港鐵站？而家幫港鐵賣廣告咩？ 9.Why回流中產要臨老先去學普通話？ 10.Why要安排回流中產同大陸無印女子在緣份的天空下浪漫地遇上？ 大抵你還可以提出更多質疑，但偏偏，劇情就係咁，沒有採用一個更易得本土人心的醒目安排。   真正感受，訴諸人肉 卡夫卡說，佢成世人都脫離不了一個三角形——一個由屋企和公司等幾個地點所組成的三角形。所以，懨悶。 我們，生活理應精彩過卡夫卡吧，但原來，唔好得去邊。周一至五的點對點是：屋企、公司(加一兩個不得不經過的車站商場)；周六日，自己屋企、朋友屋企、一兩個不得不經過的車站商場、一兩個你偶然才會去的車站商場——即使你去埋郊外，頂晒籠，加多一點。 可以肯定，香港有些地方是你永恆都不會、或從未諗過會去的。 如果我們將自己一生到過的港九新界地方，在香港地圖上點出來，多極有個譜。 這當然沒有問題，反正現在又不是鬥去香港不同地方破甚麼紀錄(破紀錄呢啲嘢留番俾周融做吧)；但真人真事，有一天我突然感到好好好好好悶，而咁啱朋友有車，願意陪我無聊，於是便開始了兩條友周圍兜的生涯——可能是某個周六午後驅車駛入屯門某個從未去過的屋邨食個茶餐；可能是某個周日入去南生圍然後出番去元朗；可能是某晚等我開夜過後駛去葵盛唔知邊度(我真的唔知係邊度)望望；可能是深夜駛去某工廠區後落車感受甚麼是沒有路人的都市；可能是駛到上環西環再落車亂行遙想香港開埠歲月；也有可能是駛去某個我講唔出名的新界村落，聽朋友追憶一段發生在該村落的媾女失敗往事………到後來，朋友冇車嘞，又夾唔到時間，我就選擇單拖選搭一些從未搭過的巴士路線，亂咁搵一個站落車，落車後再亂咁行，行到乏力就亂咁衝入一間舖頭食啲嘢，再行(但只會選擇秋冬進行，畢竟我真的會中暑)……… 無論是二人同行抑或一人齋行，過程中都不含任何特定目的，也沒有懶型地試圖從中發掘甚麼生命意義；而只是想在一個自己住咗好耐、似乎好熟的地方，純粹看 / 搵一些生面口的景物。 然後發現：對於香港，我原來冇想像中咁熟。 所以《點對點》有樣嘢真的hit中了我——要認識一個地方，最好(而很多人覺得笨)的方法是：人肉地去到那地方，用肉眼去看；而不是單純透過一些別人的口述或概念，作出抽象片面唔到肉的理解。 所以，那位提出「七俠五義」概念的律師應該親身去一次暗角，人肉地感受一下「七俠五義」的忠肝義膽滋味，多謝。   撰文：月巴氏 facebook專頁： https://www.facebook.com/fatmoonba blog：http://fatmoonba.blogspot.com/ email：fatmoonba@yahoo.com.hk

2014-10-29

一年容易又萬聖。佳節前夕我收到一封讀者來信，內容大致如下：「月巴，點解你咁鍾意睇喪屍片？可以話我知睇呢類戲究竟有甚麼意義嗎？」 喪屍片給我的教訓 先答前半part：我都唔知。總之，自從小學時在德福商場某影音店門外，睇到某齣描述一班爛面鬼佬鬼婆在爭食人類的腸呀胃呀kidney呀的戲時(好多年後才知道這個震撼畫面來自George A. Romero的《Day of the Dead》)，便肯定：這類美食電影將成為我此生不渝的愛。 再答後半part：意義未必談得上，但我是一個即使在狗屎垃圾也可以閱讀到教訓的人，所以，喪屍片同樣帶俾我不少人生教訓。我甚至發現，做人，太多拘束了，不夠free，而很多人為問題都只會在人與人之間出現(這一句有點廢話)；做喪屍，活在喪屍的國度，一切問題當堂不再存在，關鍵在於：很多纏繞 / 困擾人類的東西和概念，他們都沒有。 喪屍，擁抱6個沒有主義 1.沒有貧富：糾纏大部分人的最大問題大概是：隨時做足一世窮人。正如上周那篇相當嚴肅的文章《月入萬四蚊，依然是一隻蟻民》所說，即使你月入過萬，一早超越了那條光明磊落貧窮線，但依然擺脫不了(特首心中那一條嚴格得多、以萬四蚊作界線的)窮人線，自卑，因此而起。但看看喪屍吧，他們食完人是唔使埋單的，唔使埋單，自然不需要人工——沒有人工，就不存在人工夠唔夠萬四蚊這回尷尬事。 2.沒有階級：因為人工高低，形成貧富之分；因為貧富之分，造成階級觀念——這是人類永遠擺脫不了的。奇怪是，當人變成喪屍，竟然不再劃分等級，大家都爛身爛勢甩皮甩骨，無分彼此有腸齊齊食(不過，有時為了搶食新鮮的腸腸和kidney，喪屍難免出現內訌場面)。更難得是，喪屍不會學人咁見高拜見低踩，在他們飢渴的眼中，無論閣下是首富還是(搵唔夠萬四蚊的)poor guy，都是一樣咁好味！有錢定冇錢，never mind，只要有腸有胃有kidney，便是(喪屍眼中的)VIP。 3.沒有良心：「唔好吓吓問政府官員有冇良心，我份工唔係要我憑良心做嘢。」阿Raymond如是說。芸芸高官中我向來偏袒阿Raymond，因為他零舍親切可人，而他這句出自肺腑的話亦摑醒了我——做人最煩的一件事，就是有良心，但良心，你明明睇唔見兼找不著，偏偏總是在某些critical moment失驚無神標出來，令你唔安樂………但要做到唔帶良心(返工放工過日常生活)，好多人又做不到——除非變成喪屍。正如阿Raymond份工唔係要佢憑良心做嘢，喪屍食人時一樣唔．使．憑．良．心。喪屍沒有(道德)意識，因此沒有良心，相當自由奔放。 4.沒有意識：近日一班很擔心青少年心智發展的高官議員在思考：應該抽走通識科的政治內容，讀番中史好過。是的，青少年有意識，會覺醒；意識即使可以被控制，但又不是話控制就控制，很煩。喪屍不同，喪屍根本沒有意識，任何通識經由他們的無意識都只會轉化成：唔識。培育一班聽話的喪屍，你需要做的，就是定時餵佢哋食腸腸和kidney，俾啲著數，搞掂。 5.沒有愛恨：喪屍生活好簡單，沒有「愛與和平」，也沒有「恨與暴力」——只有「食與人肉」，that’s all。他們生吃人(這麼一種殘暴行為)，並非基於恨與暴力，正如製造和穿著皮草的人，也不會說他們製造和穿著皮草是基於對動物的恨，當然更加唔會話自己其實崇尚暴力；而只是，個人選擇。 6.沒有瞓覺：無奈，這麼自由奔放的喪屍，還是需要為口奔馳(「為口奔馳」呢句嘢簡直是專為喪屍而設！)。人類返工，無非為搵食；喪屍，一樣要努力搵食——而且請留意，當你話自己為了搵食日做「一個對」已經好辛苦時，喪屍竟然是一日工作24小時！你有見過喪屍瞓覺嗎？我就冇嘞。我開始相信，塵世間真的有生物是可以24小時non-stop工作的……… 嘩，咁辛苦，我寧願做番一個(有意識兼有良心，識得分辨愛與恨、和平與暴力的)人。每次睇完喪屍片，我都深深感受到生而為人的可貴，和可悲。唉。 撰文：月巴氏 facebook專頁： https://www.facebook.com/fatmoonba blog：http://fatmoonba.blogspot.com/ email：fatmoonba@yahoo.com.hk

2014-10-22

窮，可以是一個好主觀的概念(所以不少億萬富豪依然嫌自己好窮而努力地不擇手段搵錢)。當然，也可以好客觀。 月入過萬四好重要！ 客觀，在於一條(由高層次專業人士所制訂的)線，貧窮線。 回到2013年9月30日，政府發表了一篇文章，《制定官方貧窮線的作用和價值》：「作為扶貧委員會(委員會)的主席，我衷心感謝委員在過去十個月努力不懈地工作，使這項重要任務能提早完成。我們會以同樣勤快認真的態度去處理委員會往後的工作………」Oh sorry，以上一段洋溢官腔(所以勁悶)的開場白，大可以skip(補充：文中的「我」，是林鄭)。 不能skip的是以下一段：「以2012年計，單身人士的貧窮線訂於$3,600，二人家庭為$7,700，三人家庭為$11,500………貧窮線將因應住戶每月收入中位數的變動，每年作出更新………」這份光明磊落的公布說明了：一個光明磊落的窮人，就是每個月連三千六百蚊都搵唔到的人。 於是，月入過萬的你好雀躍啦，當正自己是有錢人啦，點知特首在接受一個(由外國勢力操控的)外國傳媒訪問中表示，月入不足萬四蚊的人，同．樣．是．窮．人。基於特首在地位和職級都比林鄭高，活在崇尚身份權位的香港的我，自然採用特首一錘定音的窮人線。香港人從此多了一個貧富分類法：月入過萬四 vs 月入低於萬四。 對於正常的生活觀念，我們自然也要因應這分類法而作出正常的調整。 1.見工填要求待遇時務必填上$14,000，這是你對自己(人格、公民權利)的一個最低要求。 2.千萬不要再以為自己月入過萬好巴閉，這只是你(和你老闆)對你的侮辱，每個月出一次糧，每個月侮辱一次，西合You！月入過萬四先大肆宣揚啦唔該。 3.你個女帶月入不足萬四的男友見你，你大可以咁寸佢：「你連平等選舉權都冇資格擁有，就想擁有我個女？嘿。」 4.月入不足萬四的你就算中咗六合彩金多寶，嚴格來說你依然是窮人，因你月入依然不足萬四(你老闆絕不會因你中咗六合彩就對你刮目相看大幅加你人工)。 月入過萬四又如何？ 我97年畢業後返第一份工的人工是，$8,000。一年後，薪金調整，完美地加了5%，$8,400……… 你可以話我現實(生活在香港現實一點好正常吧)。之所以努力讀書迫自己升上大學，就是為了傳說中那句「月入過萬」。 「月入過萬」，(曾幾何時)恍如一句咒文，施咒效果是在我和同年代同學心裡埋下一句：第時一定要月入過萬。而要月入過萬，必先大學畢業。但原來「大學學位」跟「月入過萬」，並非對等式。 鬼叫我懶型，沒有像同學般去搵教書和政府工，反而毅然投身傳媒行業，在填「要求待遇」一欄時，為表誠意與決心，我填了一個數字：$8,000。結果，咪得償所願囉。但好灰的我並不灰心，我依然將「月入過萬」set做人生目標。 我努力我奮鬥我死做爛做博取上司好感！可喜可賀終於月入過萬了！我冇辜負我的大學學位！我不是窮人！——但當時的我點會知道，原來在地位高我好多級的特首心底暗角裡，月入過萬的我依然是poor guy，一個連基本公平投票權都冇資格擁有的poor guy。 從數學的觀點看吧。以八千蚊作為起薪點，而咁好彩地每年都榮獲5%薪金調整(同是打工仔的你應該知道，那些唔知乜鬼協會的乜鬼人士往往提議僱主作出低於5%的薪酬調整百分比)，那麼，我究竟要用上幾多年，才能脫(特首口中的)貧？ 經過精密計算，原來，只要無風無浪等到第十二年，月入就能夠昂然突破萬四蚊。 而幸運地，出來做嘢近廿年的我，月入終於安然超越萬四了，我不再是窮人，但我依然是一個不能享有真普選的人——尤其當我睇完那場由所謂德高望重人士做主持的對話之後。 撰文：月巴氏 facebook專頁： https://www.facebook.com/fatmoonba blog：http://fatmoonba.blogspot.com/ email：fatmoonba@yahoo.com.hk

2014-10-15

10月，一個對我意義甚深的月份，因為我生日(但過咗，不要跟我唱生日歌)。2014年10月，意義仲深，因為佔中(但傳說中的佔中根本從沒發生)，令我學到好多。 我覺得大了一歲的自己明顯醒咗 如果經一事真的會長一智，大一歲也應該長啲智。但，Sorry囉，我們都有一個錯誤認知，以為智慧真的會隨年齡增長而以正比例地增長。還看世界，大把比你老的人，都萌塞過你蠢過你。 但今年，我真的感到大了一歲的自己明顯醒咗，對一些事物更有了前所未有的嶄新認知。 我很想在這裡分享——即使你唔想我分享，我都要分享，就像那87枚催淚彈，明明冇人想去享用也要被迫享用。Yes，監粗嚟也是我新學懂的待人接物態度。 1.我開始發現，佔中可以好就手地解釋所有事：你間蟹舖冇生意？佔中囉。你去唔到政總開會？佔中囉……… 推演落去：Why啲橙貴咗？佔中囉。Why太陽照常在東方升起？佔中囉。Why地球仲係keep住自轉？佔中囉。Why我唔中六合彩？佔中囉。咁Why佢又會中？都係因為佔中囉。(我重申：傳說中的佔中根本從沒發生。佔中，只是個方便稱呼。反正冇鬼佬鬼婆會睇我個欄，我不recap in English了。) 2.任何一個動作，總存在(至少)一個約定俗成的意義。例：在你面前，一個三五識七的男人無端端死命攬住一個三五識七女人的腳，你會認為佢：A.癲咗；B.意圖不軌；C.唔覺意啫………OK，你可以話以上例子較具爭議性，偏偏一些在你眼中意圖最顯易而見的行為，竟然可以有另一種吹佢唔脹的劃時代解讀。 例：一個市民見曬，好心拎把遮幫差人擋太陽，在差人眼中，這行為已足以構成挑釁。 如果落雨時我擔遮遮埋人哋，我咪變成雨．夜．屠．夫？ 3.差人，對外宣稱的職責是除暴安良，實際工作是：拆棚。但拆棚還拆棚清場還清場，至少他們真的強調只是在清除障礙物而非清場。戴口罩的黑衣神秘人，對外宣稱的職責是………我都唔知，而實際工作是：(幫差人)清場。 既然戴口罩的黑衣神秘人正在履行差人職責，為表尊重，下次見到佢哋使唔使嗌聲「阿Sir」？但我戥佢哋唔抵囉，履行著差人職責的他們，卻未能享有差人的福利………又抑或，不便讓面容曝光的佢哋，難道是飛虎隊？ 4.當差人把法庭頒的禁制令俾相關人士時，他會同時作出溫馨提示：可以接可以唔接。我強烈要求稅局寄稅單給我時，也在信封面補一句：可以交可以唔交，thx。 5.其實，我OK認同「我辭職都解決唔到件事」這命題。所以第日遇上老闆話炒我時，我打算咁反駁：「你炒咗我都解決唔到件事囉。」但我又隱隱然估到老闆會咁講：「炒咗你的確解決唔到件事，但至少，唔使眼冤。」是的，就算某人辭職都解決唔到件事，但至少，唔使眼冤。 6.身邊不乏球迷，睇波時往往既捧A隊又捧B隊——OK fine，睇波捧邊隊，不涉道德抉擇。但在一些大是大非面前，就必須有立場有選擇，冇得話兩邊都撐咁著數咁賴皮。假如「是」和「非」你都撐，這不是大愛，只代表你是非不分。當是與非撈埋，只會撈出一個更大的非(正如任何嘢同屎撈埋都只會變成屎)。 7.多謝男神子華，多謝他重提「光明磊落」四字。講堅，我已經好耐冇喺大庭廣眾聽人講呢四隻字——尤其在這一個太多人在光天化日下幹著絕不光明磊落勾當的年代。君子坦蕩蕩小人長戚戚，君子做人處事光明磊落，所以既坦蕩又奔放(坦蕩不等同裸體)；小人呢，專門陰濕地做陰濕嘢，過程中唔想俾人知唔想俾人見，所以既憂且懼。 近日爆紅的許Sir(Sorry，我以前真係唔知有呢個阿Sir)，應該是子華fans吧，難怪他夠膽用「光明磊落」去形容差人清理障礙物的行動(只是清理，不是清場，清場是由另一班戴口罩的黑夜神秘人做的)。原來只要在眾目睽睽下擺到明去做一件事(做乜冇所謂)，就可被形容為光明磊落；那麼，塵世間大抵再沒有不光明磊落的事，有的只是：光明磊落的政棍、光明磊落的蠱惑仔、光明磊落的強姦犯、光明磊落的暴徒、光明磊落的行賄受賄………Yeah。 撰文：月巴氏 facebook專頁： https://www.facebook.com/fatmoonba blog：http://fatmoonba.blogspot.com/ email：fatmoonba@yahoo.com.hk

/136



C觀點

中原城市領先指數

廚神

旅遊