AM730

全部專欄 , 事必低頭

事必低頭 - 土下座

PS4《人中之龍極》打頭炮

2016-01-21

踏入2016年，土下座連續兩期都係講手機遊戲，鬼叫手機平台大勢咩！不過支持家用機嘅gamer亦唔使擔心，皆因今年頭炮大作《人中之龍極》繁體中文版，今日已經正式推出。老實講，外人會覺得呢個系列，集集都係黑道、女優、惡搞劇情，同一條方程式玩足10年，莫非未厭咩？但就如無綫師奶劇例必尋親同爭家產一樣，有啲元素已經成為慣例，你睇徐克導演嘅戲冇白鴿你都投訴啦！今次呢隻game只係翻兜10年前首作，強化劇情、內容同畫面，但由於首次有中文版，多少都有吸引力，SCEH亦好睇重呢隻game，嚟緊會喺西九龍搞個AV女優見面會造勢，波多野結衣和川莉娜(唔好扮唔識嘞)真人仲會嚟香港，宣傳贏晒！

《Clash of Clans》新作香港玩先

2016-01-14

上期講完madhead新作蓄勢待發，但有新作嘅唔止係madhead，因為手機遊戲《Clash of Clans》一躍成為去年全球第一嘅芬蘭頂尖遊戲開發公司Supercell，最近亦將推新作測試版，暫時只有幾個地區嘅App Store上架，香港有份！呢隻《Clash Royale》用番《Clash of Clans》嘅角色，玩法就轉為卡牌+塔防+即時戰略，所有玩家開場都會有兩座炮塔及一座主堡，並可以帶8張卡片上場，消耗定時回復嘅資源去將卡片實體化，向對方進行攻擊，只要打爆敵人基地就算贏。遊戲最爽係每場比賽都係3分鐘左右，有勁卡嘅人雖然著數，但都考驗即時反應同事前準備，玩落有少少《英雄聯盟》感覺，響咁基本嘅設計下，擁有咁高嘅遊戲性，呢間廠可以成功，完全唔係靠運氣！

「神魔」新作《時空之門》要留意

2016-01-07

新年新開始，第一件事想分享，本已連霸App Store付費排行榜榜首已達3年嘅手機遊戲《Puzzle & Dragons》，終於響上年輸俾挑戰者《Monster Strike》只得第二名，間接代表王朝已過。短短一段字，已經帶出兩個同本文有關嘅重要名稱。香港遊戲廠商madhead，當年模仿《Puzzle & Dragons》玩法開發出《神魔之塔》，引來無數負評，但由於遊戲水準高，加上全中文，結果響台灣爆紅，直到而家都未搵到對手，勁到《Monster Strike》進軍台灣時，都要同《神魔之塔》玩合作聯名，估計每年都有超過10億新台幣生意，咪話唔癲。當你以為madhead一間抄game抄到年賺幾億嘅公司，唔會再投資搞game？又錯，皆因佢哋年頭宣布新遊戲即將面世，名為《時空之門ChronosGate》，土下座仲收到風，隻game搞咗差不多兩年，開發成本數以千萬元，目前只得幾張圖、一個fanpage，但唔夠5日都已吸引到超過6,000人like，絕對係信心表現。所謂人誰無過，今時今日仲肯俾錢俾心整新game，好與壞都好，土下座都只會讚、唔會踩！

年尾大作《高達EXVS-FORCE》萬人中伏

2015-12-31

俗語話：「男人愛高達，女人唔明白。」男仔世界好簡單，十個男人真係九個鍾意《高達》，你問我哋買個Birkin bag要排幾耐我哋一定唔知，但阿寶同馬莎打咗幾多集換過幾多部機體，分分鐘調轉都識背。所以PSV響年尾推出大作《機動戰士高達 EXTREME VS-FORCE》可以話係今年最後一擊。不過，包括土下座在內，唔少人玩過之後都覺得「中伏」，皆因呢隻高達響PSV平台推出，明顯機能唔太足夠，唔講畫面麻麻，明明參戰機體過百，但實際可用嘅只得40部，唔止係咁，佢連最基本嘅街機雙打模式都冇，而應該係呢個系列嘅重點：連線對戰模式，亦都「閹割」得番1對1，仲要面對面先可以對戰，認真大鑊！結果推出唔夠一星期已經有「值崩」(即係跌價)跡象，可以話連忠實fans都唔賣帳。不過，高達嘅嘢，今次中伏鬧完，下次再出都肯定會買，明知係屎都甘心再踩多腳，呢啲先叫「男人的浪漫」呀！

小島工作室 Game未出先推商品

2015-12-24

今年遊戲界最大粒花生，該屬「遊戲之神」小島秀夫同Konami決裂一事，唔止全世界game友發起向Konami豎起中指活動，亦令「小島神」再增添幾分傳奇性。實在好難相信一個遊戲製作人會有小島咁嘅魅力同影響力，講緊唔係日本，而係歐美、全世界，絕對唔簡單呀。但隨住佢喺上星期二(15日)正式宣布同Konami合約完結，似乎事情可以告一段落。估唔到嘅係，小島神亦早早有準備，唔止喺宣布完約後，即刻同SCE聯合發表訪問片段，表示已成立個人工作室Kojima Production，首隻game仲會係PS4平台獨佔，亦連隨公開以佢新工作室為名嘅online store，冇錯，係online store！小島新game就未有得睇住，但你一樣可以真金白銀買Kojima Production嘅goods，Tee、杯、貼紙加徽章，全套價錢多謝6,480日圓，21日開賣，下年2月就送貨。乜都未出就先叫你買嘢(仲分分鐘賣斷市)，真係淨得小島秀夫一個可以咁玩！網址：http://kojimaproductions-store.jp/ja/

《人中之龍極》TOYSOUL有得玩

2015-12-17

轉眼突然又一年，去年復活嘅玩具界大事TOYSOUL今年再度舉行，而且地方更大更多單位參展，土下座當然唔會錯過湊熱鬧機會。留意到今年SCEH重鎚出擊，直情當係亞洲遊戲展咁搞，皆因牌頭唔止有全亞洲首次做試玩嘅《人中之龍極》，更同潮人最愛嘅Hot Toys聯名推出一隻特別版Shock Trooper 1:6，要你先消費到一定金額先可以加錢買，又罕有又有價值。講番《人中之龍極》，SCEH再次早過日本台灣嚟到俾香港玩家率先公開試玩，證明喺亞洲區已經有好大牙力，再加上每日入場買嘢都有唔同優惠同特別禮品，唔講句甘拜下風都唔得，相比之下所謂「對手」Xbox應該上就真係完全死晒，連新嘅舊機當錢trade新機活動都毫無吸引力，再繼續捱打落去，真係冇問題？

FF7重製有暗湧

2015-12-10

早前喺E3稍為露一手即引來全世界fans歡呼嘅《Final Fantasy 7》remake版，終於喺Playstation Experience 2015度放出最新片段，證明開發商Square Enix真係有做緊嘢！最新片段已經可以睇到遊戲最初嘅劇情同埋主角Cloud及Barett新形象，雖然遊戲已經由傳統J-RPG嘅回合制變成歐美玩家比較buy嘅動作類型，但仍然不失吸引力，睇到土下座呢個老人家非常激動。不過，正當大家討論緊唔知幾耐先可以真正推出之際，今次remake版監製野村哲也及北佳範已經率先同傳媒透露，原來呢隻新版會「斬件上」，英文講法係「multi-part series」！心水清嘅機友一聽就知唔對路，點知兩位仲為當中原因解畫，話因為重製後容量巨大，一隻碟裝唔晒咁話，但老老實實，當年隻《FF7》咪又係要換碟，1隻Blu-ray Disc當你50GB，唔夠位？3、4隻碟夠啦啩？相信冇fans會覺得合理，睇怕Square Enix好快又要面臨一場公關風暴了……

打機可以發達？

2015-12-03

早前香港電競總會(ESAHK)高調宣布正式成立，稱得上籌備已久，部分老闆仲同土下座係朋友，可以講ESAHK確係具規模嘅。總會成立，又係咪可以令本地電競運動(E-Sports)好似外國咁勁呢？老老實實，土下座好有保留。香港好多人對遊戲產業仍然好少認識，未夠全面客觀，成為唔到「文化」，好多後生仔，因為見到達哥呢類打機明星出現，極端地覺得電競必定有得做。問題係現實世界並唔係咁，的確，職業電競選手，最高年薪可以去到近200萬美金，但呢個數仲少過一場世界級德州撲克(Texas Poker)比賽嘅獎金。而且唔好以為電競只係將娛樂變職業咁簡單，其實電競選手生涯極短，你有潛能被人揀中嘅，由十多歲已經要開始每日最少8個鐘咁訓練，重複又重複打同一隻遊戲，搵到錢嘅選手亦係少之又少，當中最搵錢電競遊戲，更加唔係本地大熱嘅《英雄聯盟》。總知，千祈唔好以為打下機就搵到錢，要諗清楚到底自己係想打機求開心，定打機求人生！

《星球大戰：戰場前線》劣食的價值

2015-11-26

本來今期仍然可以繼續講《Fallout 4》影響力，不過土下座唔少朋友都好有疑問：明明同期仲有隻大作《星球大戰：戰場前線》出咗，點解唔見我寫？原因簡單，因為確實冇寫嘅價值。以game論game，呢隻「星戰」完全去唔到以往開發廠DICE嘅水準，平衡度差、遊戲乏味、只有網上對戰模式等，對FPS愛好者嚟講，特別係同期仲有隻名作《HALO 5》，更係高下立見，外國網民一面倒負評。不過，作為「星戰」牌頭嘅遊戲，呢隻game又確有原作味，甚至應該講，似乎一開始，呢隻遊戲就係為fans而設，你會發現遊戲入面所有細節，包括音效、激光槍射擊手感、Snowspeeder嘅飛行感覺等，都極力還原電影嘅「不真實」，連調色都刻意充滿懷舊感。作為FPS，遊戲非常糟糕，但假如你係「星戰」fans，遊戲則係一時之選。情懷嘅嘢就等於媽媽煮嘅屋企飯咁，係呀，成日中伏又多劣食，但食落又真係無比溫馨，咁你話，呢隻遊戲點會有寫嘅價值？

《Fallout 4》廢土求生破紀錄

2015-11-19

繼續講《Fallout 4》。土下座今星期亦開始進入廢土世界，主角為避開核災難入到避難中心，點知遇到巨變，無故冰封200年，醒來後發現世界已經完全唔同晒，昆蟲受輻射影響變成巨大怪物，空氣、果實、水都有輻射，周圍都係末日景象…講真，《Fallout 4》淨講題材已經極為吸引，加上遊戲玩法勁自由，起屋、改武器、建立組織甚至組合機械動力裝甲等，全部都可以花好多時間，難怪未出已被睇高一線，銷量極速喺一日內突破1,200萬，而喺電腦遊戲平台steam度，最高峰時，更有44萬人同時玩緊呢隻game！數據未完，因為最有趣係，連世界知名嘅「鹹片網」Pornhub都嚟抽一抽《Fallout 4》水，表示隻game推出嗰日，網站流量竟然下跌咗足足有10％，認真搞笑。諗真啲，其實都係「打機」啫～

《Fallout 4》首次中文屈晒機

2015-11-12

由著名遊戲開發商Bethesda Game Studios，用4年時間開發嘅重磅遊戲《Fallout 4》終於推出，形容呢隻game為「全球期待」也絕不為過，外國瘋狂係意料中事，估唔到今集響香港都一樣備受追捧。唔講唔知，呢隻game名氣係大，但實際上每集嘅銷量都可以用個「死」字形容，絕對唔係甚麼熱賣大作。有業界朋友好奇問土下座，點解今集突然咁爆？個人認為「有中文」係最大原因。其實呢隻game向來都極為重口味，文本龐大唔易消化，大膽講句，以往嘅fans，估計超過半數都係玩網上下載嘅PC翻版，再安裝民間翻譯嘅漢化版先識玩。不過點都好，今集如果真金白銀支持番，總算係良心表現。土下座唔係呢隻game嘅fans，不過Bethesda名氣實在太大，亦好少失手，於是今集都忍唔住參一腳，暫時除咗畫面靚之外，都冇乜其他評價住，至於其他同期推出嘅game？Sorry嘞，對手太強，抵輸！

《刺客教條：梟雄》冇人氣

2015-11-05

黃秋生有份主演嘅無記重頭劇《梟雄》引嚟唔少話題，無獨有偶，遊戲界都有隻《刺客教條：梟雄》推出，主機版發售一星期，PC版亦就快出。作為Ubisoft一年一度重頭遊戲產品，今集無論話題性同人氣似乎都非常一般，毫無大作氣勢。好多人歸咎於Ubisoft「一年出一隻刺客」呢個戰略上面，但其實以《刺客》呢類open world大作，就算玩法、畫面、遊戲引擎、系統等全部都相似(衰啲講直情集集一樣)，一年時間都絕對冇可能開發到一隻，所以《～梟雄》都係早喺上集未出前已經開發緊。土下座玩上手約3、4個鐘，認為整體比上集都有改善，但成隻遊戲都變得愈來愈單調及易玩，角色動作複雜到唔似玩刺客，裝備花款多到一打十都絕無問題，而飛簷走壁時，甚至冇得再玩強制跳躍突破固定路線，好多設定都顯得隻game係俾年輕玩家易上手。其實食物再好，都唔可以食足三餐食一年，Ubisoft係時候諗諗係咪已經玩爛咗呢個皇牌系列。

PSV有可能從此玩完

2015-10-29

傳聞Sony總裁已經宣布唔會再為PSVita開發新作品，如果消息屬實，咁PSV前景就更為不樂觀嘞！其實手提機市場，近年都受手機影響變到大不如前，相信都唔駛多解釋，Sony嘅PS4氣勢咁強，全力谷起再拋開比數的確先係上策，畢竟手提機市場對手係任天堂呢個大佬，難打！可能你會問土下座，點解手機大勢，任天堂又可以憑3DS企硬市場，仲大幅度拋離對手？原因係任天堂向來玩軟、硬體相輔相成，而且將旗下遊戲品牌揸得好緊，你要玩《寵物小精靈》只能買3DS，而且咪以前任天堂只識食老本，佢地剛剛先成功申請新專利：只要你帶3DS到某個地點，先會產生某啲劇情，若然附近有幾部3DS，連線之後劇情亦會因此產生變化。當間間廠都強調Online平台對戰有幾方便，任天堂反而想你唔方便。呢個專利明顯係叫大家唔好做宅男，就算打機都要出街同其他人交流，老實講土下座幾buy，任天堂諗法始終係唔簡單。

《Magicka 2》易學難精四打神作

2015-10-22

嚟緊幾個月都好大鑊，皆因今年唔少正game都迫喺聖誕前後推出，數數手指有《Fallout 4》、《Star Wars Battlefront》、《Call of Duty: Black Ops III》、《Assassin’s Creed Syndicate》等等，多多時間都唔夠用。不過迎接呢堆勁作之前，土下座私心推薦近期一款相對比較小型嘅遊戲《Magicka 2》，佢同今年黑馬《HELLDIVERS》都係同一遊戲班底，玩法亦係高空角度望落去嘅動作射擊遊戲，除咗有得四打之外(可以攻擊自己友)，更同《HELLDIVERS》一樣易學難精，隻game有八種「元素」分別代表水、生命、護盾、冰、閃電、死亡、土、火，若要用進階魔法，就要組合元素次序，例如依次序按水、護盾、土就會變出石盾抵擋攻擊，單係記魔法已經令人頭都大埋！

手機版《機戰》唔使錢

2015-10-15

大約2個月前，BANDAI NAMCO宣布會將旗下皇牌系列《超級機械人大戰》推出手機版本，唔少fans都有喜有悲，喜嘅當然係見到《機戰》有新嘢，悲就更加唔使講，日本廠將啲大Titie出喺手機，往往會搞到啲game變成「課金」玩法，免費下載但就出好多內容引你俾錢，例如「課金」抽角色咁，而且萬試萬靈。突然間呢隻叫做《超級機械人大戰 X-Ω (スーパーロボット大戦X-Ω)》嘅手機版機戰就已經出咗，一如所料真係好多「課金」位，基本至抽角色要用錢，進階到friend list想加多幾個位都要俾錢，不過大勢所趨，又有乜辦法呀！不如睇睇佢美好一面：畫面靚、登場作品足料、系統有保留機戰元素等，雖然戰棋玩法變成即時戰略，但玩落都幾爽嘅，土下座唯一不滿係竟然冇全語音，肯定會少咗班「聲優」迷撐。

<
1
...
2
3
4
5
6
...
8
>

/136

新聞搜尋



	至

C觀點