神戲活現 (黃秋生) - 黃秋生
2015-11-05

演員要學啲乜?好多人以為演員唔使學,即係不學無術,會做兩個表情就得,咁即係好似識唱卡啦OK就係歌唱家一樣,對表演藝術一無所知。 以下我話俾大家知,一個演員基本要學啲乜。記住,係基本咋,唔包你可以成為偉大演員或者藝術家㗎。 演員首先要學會運用自己身體、聲音同埋情感,仲有基本文化修養。先講身體,我哋唔係運動員,唔係舞蹈家,唔係武術家,基本上演員乜都唔係但係又乜都係,演技有一套特別嘅形體訓練法,形體訓練係學習如何控制身體每一部分,了解自己身體及增強體質,增強體質並非要你做大隻佬或身材曼妙嘅靚女,如果係咁,演員就只得一種身形,肥或瘦都唔使做喇,角色於是得一種,做乜角色都成個健身教練咁。學習形體主要係增加身體嘅寬廣度、柔軟性,令身體變得更加適合創作,當然,有強健嘅體格都係好事,但係不能過於特別,因為演員創作講求變化,我哋演嘅係角色唔係自己,所有工具適中最好,最容易變化,過度自戀嘅人一定唔會係好演員,演員嘅魅力來自佢哋嘅自信,同埋藝術修養氣質,演員唔係模特兒,冇一定嘅身形標準要求,唔需要完美身材,需要嘅係一個能夠靈活變化嘅身體,好似橡筋咁冇乜睇頭(為角色特別創造身形唔算),但係可塑性高。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-10-22

簡單啲講,演戲其實係假嘅,只不過我哋用真摯嘅情感,運用假借、轉注及放大種種嘅技術將之變成幻真、仿真。我成日話,真嘢係有瑕疵嘅,假嘢係完美嘅,推論、真嘢似係假嘅,假嘢先似係真嘅,所以我哋演戲其實係要追求假嘅狀態,例如鑽石,真鑽係有瑕疵嘅,人工鑽先完美,例如化妝,化咗妝好靚,冇化妝有斑點,係咪?又例如演喊戲,邊喊邊要講對白。我哋用啲戲屎嘅做例,首先假設對白係重要嘅,要聽得清清楚楚,唔係嗰啲邊喊邊講「阿爸!你唔好死呀!」嗰啲,大家不妨睇下好多電視劇,一演喊戲,有好多都唔知做乜?唔知佢哋噏乜?「係同可痕開呀,你含日去何面呀?做乞唔輕我‥‥‥下呀?你胡好欠我吓‥‥‥嘩嘩嘩!」真係死得,好似好真,真到好似殯儀館入面啲孝子咁,一把眼淚一把鼻涕,一啲美感都冇。呢種處理手法,我哋有個學名嘅,叫做繁瑣現實主義,真係好煩、好真,但係冇人知你做緊乜?想表達嘅係乜?10隻字聽到1隻,呢種方法絕不可取。 演戲係需要高度控制嘅,演員要運用佢嘅眼、耳、口、鼻,甚至身體嘅每一部分,去感受周圍嘅一切,唔係活喺自己嘅世界,唔理對手,唔理環境,甚至唔理鏡頭,唔理觀眾,要感動別人,唔係感動自己,所以有時連喊都唔使,我哋係要令觀眾喊,唔係令自己喊,戲係演俾別人睇嘅,記住!此之為真實嘅第一步。 黃秋生 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-10-08

《紅樓夢》入面描寫太虛幻境有一幅對聯:「真作假時假亦真,無為有處有還無。」此聯固然係話人生嘅虛幻,但係亦可以話係演戲嘅最高境界。 演戲似真亦假,假又像真,最重要令人相信,魔術師同老千嘅同門,其中技術,試述如下。 首先要處理劇本,即係對白,劇本係死嘅,人係生嘅,所以對白可以改動或者疏理,但主要嘅主體內容則不能改,改動整體內容乃係編劇責任。閱讀劇本,演員需要有一定水平嘅文學素養,要獲得呢種文化能力,不妨先睇100本左右嘅文學名著先,有好多語文理解力甚低嘅同業,經常對劇本指手劃腳,巴啦巴啦,話呢句唔啱嗰句唔啱,但係要佢改咩,佢又講唔出應該點。呢種毫無團隊精神嘅朋友,不在我哋討論範圍之內。 有咗閱讀同理解力之後,先至可以進入,將死文字變成生動活潑嘅語言表達階段。大家都知道莎士比亞嘅劇本充滿詩意,音律感極為重要,但經過翻譯之後,只能保留可讀性,失去可演性,打個比方,李白嘅「床前明月光」,如果要口語化表達,就變成床頭有個月光好光,即時反艇,所以韻律對白最難演。除此之外,其實一般嘅語言都充滿韻律,國語如是,廣東話一樣,所以第二步就要,重新學習語言嘅生動表達能力。我又有一個好方法,就係睇多啲粵語長片,跟前輩學習,以前啲人講嘢好鬼抵死,句句好似有骨,又幽默又清晰,睇粵語長片,實為學習講台詞嘅好方法。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-06-11

今次同大家分享下一啲演戲嘅雕蟲小技,每種技術都有佢獨特嘅雕蟲小技,可以話係秘訣,又可以稱之為竅門,之所以叫做小技,即係唔係武當內功,唔正宗嘅;冇需要練十年,係速成嘅、即食嘅,唔係大路嘢,千祈唔好將呢啲小技當作大統,但係幾好使,可以救你一時,但係又唔救得你一世,始終都係要做正經訓練嘅。 第一招,誇張。唔好一見到呢兩隻字就覺得係衰嘢,大部分年輕演員,未學行先學走,見到啲前輩表演時,木口木面都演得咁好,有樣學樣,又唔諗下人哋用咗幾多年功夫先可以做到咁樣,於是畫虎不成,變咗膠面人。 所以,第一樣要學識誇張,俾人見清楚你嘅表情,聽清楚你講嘅每一隻字,咁樣導演先可以幫你修改,老師傅教落,有呢,可以收,冇呢,冇得減,減除係容易過加嘅。 第二招,著住戲服講古仔。千祈唔好著住戲服講古仔,所謂著起龍袍唔似太子是也,服裝就係服裝,道具還道具,頭套直情當帽戴,著住戲服又咁行,著住自己條牛仔褲又係咁行,龍椅又係咁坐,喺酒吧又係咁坐,所有嘢都同佢冇關嘅,咁就叫做著住戲服講古仔。 服裝道具係冇神奇功效嘅,所有一切都需要通過演員嘅運用先有效果,見過有個演員將把木製嘅道具牛肉刀,一邊講嘢一邊不停拍下拍下拍落隻手度,我心諗,如果把刀係真嘅,佢咪成手血?佢係咪想表達俾觀眾知,佢把刀係假嘅呢?因此,其作假時假亦真,演員要將身邊所有嘢都通過演技去將佢變成真實。 第三招,聲戲聲戲,有聲先有戲,有諸內形諸外,聽聲就知你有冇戲,所以聲音係非常重要嘅,但係唔係單有感情就大晒,仲要有高度嘅控制,唔係俾感情催迫到都唔知你講乜?「你明明同去去呵合本呀嘩啦吓,你仲蝦我唔絲你西人拿㗎!……」噏乜春呀大姐?咁演法,劇本都唔使啦。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。  

2015-05-28

上期嗰篇好似未講完,但係今期有啲緊要嘢一定要講先,就係粗口歌。近幾年香港好似愈嚟愈有潔癖,最近又因為大學音樂會唱粗口歌,搞到滿城風雨,又話打又話教。其實重要原因唔係粗口,係啲(o靚)仔用粗口歌X Q啲慈母。 喺香港公開唱粗口歌(有粗口嘅歌),我可以話敢認第二,得一隊樂隊敢認第一。第1名係黑鳥,第3名係LMF,以次序排列,咁我都算係粗口歌嘅泰山北斗,所以一定要講兩句。 粗口歌呢家嘢可以分3種,(一)爛口歌,以前啲監犯、白粉佬作嘅(條柴又軟)之類。有啲內容,唱出低下層心聲。(二)堅粗口歌,又叫硬粗口歌,霑叔、李秋霞為表表者,鹹濕歌也,全部性器官,九九、七七、出出、入入,極之下流,但好有街頭智慧,好好笑(我久不久都有作,以供自娛),(三)粗口歌,軟粗口歌、冇性愛場面、字句鏗鏘有力、言之有物、主題與粗口無關,借粗口發洩不滿、鞭策社會問題、高端、大器、上檔次,我嗰啲就係呢種,大學音樂會嗰啲亦係呢種。 嗰啲老學究、臭八股,眼中耳中只有性器官,用粗口表達緊啲乜,佢哋完全唔知,講粗口都聽唔到,莫講話斯斯文文,你同佢哋講嘢,佢當你唱歌,好!咁就唱首粗口歌你聽,聽到嘞,可惜淨係聽到粗口,因為佢哋個心只有粗口,呢班友朝早正經八百,夜晚粗口爛舌。我點知?因為我見唔少囉。 粗口可以入藝術,正如裸體可以拍AV,可以係十日談,刀仔可以切水果,可以乜乜乜,如何運用,又係在乎出心,但係嗰班老柴分唔到,以為下面淨係可以用嚟搞嘢,唔可以用嚟小便,可能真係前列腺有事,滴唔到。 對唔住各位,今期有啲扯火,因為平生最憎偽君子,真小人更甚。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-05-14

 呢一兩年,好奇怪,唔知點解多咗好多人討論藝術家(或藝術工作者)資格嘅問題,先係乜嘢會,然後乜嘢局,跟住又嚟個乜嘢會,好快又會滿城風雨。我嘅意思係,冇話「定義」好唔好,但係點解忽然同時出現同一情況?世事往往就係咁奇怪、咁偶然。 無論要重新釐定,抑或係剛開始定義,各團體都有各自嘅立場同原因,我只係想提出一個意見,就係當你要定立標準、資格嘅同時,就即係同時定立咗有一班人冇資格、未達標準,所定範圍大小,非常小心,非常危險,邊個有資格?邊個又冇資格?做乜你有資格我冇?邊個有權定立資格?權力點嚟?唔係話你自立一個法人團體,你就可以隨便定立。即係我依家登記一個法律研究所有限公司,我都唔可以根據十幾個會員嘅意見,定立邊個係有資格嘅律師、邊個唔係,除非你預咗呢個準則係冇認受性嘅,所以一定要先搞清楚團體嘅立場及方向,唔係真係大家攞嚟搞。 因為近年我參加嘅團體多,藝術界嘅朋友亦唔少,所以聽埋聽埋好多嘢,於是令我諗咗好多,依家同大家分享下。 藝術呢家嘢好惡搞,乜叫有資格?乜叫專業?乜嘢人先係藝術家?如果唔需要其他人認同嘅,隨便你話係就係,唔係就唔係,如果要其他人認同呢?以我所見,都係你話係就係,唔係就唔係,冇乜國際標準嘅,條界自己畫嘅,讀完藝術去做地產算唔算專業?專科畢業喎?但係做地產喎?唔係藝術喎!即係唔落場踢波嘅球員係咪球員一樣,冇學過或者俾學院踢出校,或半途離校,但係藝術又好有風格、大受歡迎,咁算唔算藝術家?有啲理論家只做文字功夫,從來唔製作、唔生產,咁係咪識藝術?大家睇,點分?你一定義,一提呢樣嘢,好似毒品咁,死得!因為藝術好難定義,好具爭議性,同時,藝術圈乜嘢奇形怪狀嘅人都有,高手如雲,低手亦如塵,七嘴八舌,掂不得也哥哥! 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-04-23

經常有人問我,演戲時點解喊唔出?或者係,點樣先喊得出?呢個問題分兩個層次,第一係點樣喊得出,第二係是否需要喊。 好多人認為喊得出就等於好戲,如果係咁,咁殯儀館入面咪好多人好好戲?另外,好似講笑話咁,要講到自己唔笑,人哋笑先係高手,自己未講完先笑,聽眾望住你眼定定,咁樣叫做尷尬,戲屎嘅最高境界,表演者嘅惡夢。 喊一樣,自己唔喊而搞喊人哋先係最高境界,但係見者傷心,聽者流淚,呢種畫面,新聞片見得多,又或者聽朋友講述悲傷經歷,講者每每淡然,但係聽嗰個喊到豬頭咁,咁就高手嘞。 演戲一樣,演悲情戲,唔明點解一定要喊?尤其是電視劇,晚晚死老竇咁,呢啲叫濫情,好鬼煩! 所以,先搞清楚邊個要喊,演員喊還是觀眾喊?要唔要喊?幾時喊?點樣喊?抑或為咗表演俾導演睇,自己有幾勁而喊,但係又喊唔出,乾喊! 新演員、年輕演員,因為冇乜生活體驗,又或者技術未到家,往往喊唔出,愈喊唔出愈緊張,愈緊張愈喊唔出。喊、流眼淚,除咗係情感元素,仲係一種技術問題。首先放鬆,然後再放鬆,檢查下自己嘅肌肉狀況,睇下係咪處於緊張狀態,身體放鬆情況下,情感先容易釋放,其次係集中,喺現場人哋玩、講笑,你就唔好玩埋一份嘞,自己坐埋一邊自閉,保持放鬆同集中嘅狀態,拍完先玩。 情感轉移,以下講嘅唔係正統嘅情感轉移,只係一種權宜方法,最簡單係諗下有乜傷心事,死咗隻狗?俾仔飛?俾人蝦過?但若果情感真係空如白紙,咁就神仙都幫唔到你,眼藥水就幫到你。但係眼藥水呢家嘢,同演技無關,同藥物學有關,呢個時候,你已經肥佬咗……點解喊唔出嘅? 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-04-09

講到馬龍白蘭度(Marlon Brando)我就多嘢講囉,我認為每一個演員喺開始嘅時候,最好搵一個楷模去模仿,白蘭度就係我當年嘅楷模,就好似學書法要臨摹一樣,模仿佢嘅一筆一劃,所謂無規矩則不能成方圓(連李小龍都模仿拳王阿里)。但係搵對象不能隨便,好易偷錯師,必需搵一個同你氣質相近嘅,唔可以阿豬阿狗、有啲名氣嘅明星你都模仿。 過一段時間之後,就要打破呢個方圓,所謂「出格」嘞,呢段時間,需要幾耐先可以開始破格呢?好難講,有2至3年,有10年8年,視乎個人天份及努力,大概到被大眾認可你嘅演法,同你模仿對象相似嘅時候,就係應該打破嘅時候。但係打破需要勇氣,因為當你似嘅時候,就開始型,開始被大眾接受、開始紅。一旦留戀呢種境界,變成自我感覺良好,咁你嘅演員生命就同時開始玩完。你可能會紅,但係一定唔會係個偉大嘅演員,見過有啲演員一世意淫,成世都停留喺扮演對象嘅層面,連角色都唔係,只係某某人,可悲! 我之所以選擇白蘭度作為模仿對象,有好幾個原因。第一,我媽媽好鍾意佢,我細個嗰陣,成日帶我睇佢嘅戲,第二,開山老師又好鍾意佢,經常同我講佢嘅故事,第三,到最後我都好欣賞佢,包括佢嘅演技同性格,睇佢演《慾望號街車》嗰種狂野、原始,真係心醉神迷、無人能及。可惜我一直未能有機會演出同一角色。及後見佢越嚟越神化,陰影演技、出神狀態、獨特的節奏,連對白都限制唔到佢、破而不破,羅拔迪尼路都俾佢玩死。 所以我話,咁多演員中,唯有馬龍先可算出神入化,但係呢種演法唔係人人得,百分之九十九點九都係唔記得對白,走咗出光位。演員世界,老千真多。   「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。  

2015-03-19

常常聽到啲冇料到嘅表演者話:「我好投入。」但係如果你再問深入啲,投入啲乜?點投入?佢又講到唔清唔楚,好似好耐之前,我向人請教乜嘢係方法演技一樣,回答係:「方法演技即係用方法嘅演技。」答咗等於冇答,廢話! 投入呢樣嘢,其實對所有表演者都好重要。(有一派戲劇理論係話唔重要嘅,以後再講。)但係點投入呢?點先算投入呢?先同大家講下古仔。 喺好耐好耐好耐之前,有一班生番茹毛飲血,以打獵維生,公嘅打獵,乸同細隻嘅就收集野果,當隻公獵到一隻動物返嚟之後,大家都好開心,因為嗰陣打到一隻嘢,就好似依家做成一單大茶飯一樣,好難嘅。於是一家人食完之後,圍住火堆你眼望我眼,戇QQ冇嘢好做。有一晚,隻乸就同隻公講嘞(嗰陣人類大概未有分男女,只有公乸):「嗚嗚……呀呀呀……啊……」意思係:「呀嗚嗚公,咁Q悶,不如你做俾我哋睇,你點樣打到隻嘢返嚟啦!」隻公一諗,都好喎,有機會喺隻乸面前表現下自己有幾威水,就好似啲地盤工友返屋企飲住啤酒、同自己隻乸吹足一晚,講下今日點樣將條鐵拗番直,又或者好似啲會計佬、律師中坑咁,幾杯酒落肚之後,喺幾個中女面前吹,今日單嘢佢有幾威一樣。於是隻生番先生就吹起上嚟嘞,點樣自己一隻人(大概當時又未有「個」嘅概念)攞住條木棍打走晒7隻獅子,然後殺埋隻兔仔,返嚟嗰陣仲遇到隻恐龍㖭。 呢個就係第一個論劇加演出者嘅開始,個仔見個老竇吹得咁叻,於是有樣學樣,長大後又係咁吹俾自己隻乸聽,一代接一代,愈吹愈精彩,形成咗一班專門表演打獵同戰爭過程嘅階級。後來更神奇,發覺原來加上效果,例如火光、歌聲、舞動、音樂和山洞回音,再加埋搽啲泥同血上塊面度嘅化妝,更加感動人心,聽得人如癡如醉,於是又出現另一階層——巫師。當時嘅巫師就威水囉,除咗表演仲會醫人,求神問卜,甚至統治。依家啲演員就水皮喇。 好嘞,巫師表演時嘅最高境界叫做「出神」。出神是甚麼東西呢?就係好似喺度做緊啲嘢,但又唔係好知自己做緊乜,就好似跟住個劇本、劇情同對白,但係又到咗另一境界,係自己又唔係自己咁。我見過咁多演員,得一個我認為佢到咗呢個境界,就係馬龍白蘭度。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-02-26

今期講散打,唔係打功夫嘅散打,係講下演技上嘅一啲歪論,一啲散收收嘅道理,似是而非、懶勁嘅理論,大家叫佢做「散打」都得。 (一) 入戲出唔番嚟 呢樣之前好似講過,但係講得唔係好清楚,因為我對呢種講法幾反感,而且呢種講法害人不淺、扮晒嘢,所以再講多次,講清楚啲。 通常咁講嘅都係戲行新仔,道聽塗說話有種嘢叫入戲,好神奇,入咗會出唔番嚟,好似黑洞咁好大引力,講出嚟會令人覺得佢好努力咁演戲,全錯!演戲係用演技,唔係催眠,就算催眠都係催觀眾,演得好與唔好都係催眠,好嘅就催到觀眾相信假象(make believe)、催到觀眾情緒,演得爛嘅就催到觀眾瞓著。 佢哋所講嘅入戲,其實係一種病態(當然,佢哋從來冇入過),呢種情況先要睇心理醫生。我哋演戲點演?如何創造角色?其實我哋冇可能完全變成另一個人,只可以令人相信我哋就係角色,好似老千咁呃人,大衛高柏飛會唔會以為自己真係識飛呢?一個老千扮完醫生騙人,返到屋企會唔會仲以為自己係醫生,幫老婆仔女醫病呢?演員一樣,演戲只會用到自己某些人格特徵,唔會全部,如果唔係就唔係演角色,係做自己。我哋通過觀察、模仿、分析及扮演去接近別人嘅世界,不可能全面咁進入咗另一個人,如果可以,呢啲叫做鬼上身。 咁點解又有人話入咗去出唔番嚟呢?唔係冇,不過喺香港少之又少,而且一定唔會係嗰啲話自己出唔番嚟嘅人,飲醉酒唔會話自己醉嘅。 嗰啲真係出唔番嚟嘅朋友,可能因為冇技術,或者因為突然間發神經唔用技術。喺創造過程中,冇咗一個監察自己嘅「超我」,又忽然間發現到一啲潛藏喺自己內心世界嘅陰暗面,而呢啲特質又同角色相近。從準備到創作期間,大概有半年至9個月嘅情緒、精神投入,演完之後發覺,死嘞!乜我變咗咁嘅?自己又接受唔到(演戲係一個自我了解嘅過程),行為變異,不能面對,冇修復技術,又唔求醫,呢種就真係叫出唔番嚟嘞。 我哋學演技,除咗學習進入,仲要學習退出,咁先有一個健全嘅心志,出出入入,好似和尚入定出定咁,好過癮。 原來講一種散打都講咁長,下期再續。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角,香港演藝學院校友會榮譽主席。

2015-01-29

今早天氣凍凍凍,一起身想去食個豬骨拉麵暖下肚,去到間舖啱啱開市,要坐低等一陣,冇帶書,於是魂遊太虛、開始諗嘢。經常有人問我平時有乜愛好、鍾意做乜?我諗我最大嘅愛好就係諗嘢、偷得浮生,講得好聽啲就係思考。 我坐喺度諗,背住板前(日式廚房),背住一邊準備開工一邊吱吱喳喳閒談嘅員工、師傅諗嘢。到底有乜唔同呢?我忽然覺得呢間店同以前有啲唔同,呢間店以前係由日本人管理嘅,依家全部都係香港人,除咗多咗啲吱喳熱鬧之外,到底我感受到有乜唔同? 若果大家去過一啲由日本人管理嘅料理店,不妨觀察下、感受下,有日本人在氣氛寧舍唔同,工作人員專注,無人亂吹水,唔係淨係出入有一堆人向住你大叫「依啦乜乜乜呀!」咁簡單,你可以話日本人木獨、冇情趣,做嘢啫,使乜咁認真?係嘞!呢個就係重點,認真! 跟住我又聽到啲夥計講到買衫、尺碼,「我又要一件。」咦!好衰㗎……黃生,食碗麵啫,使唔使咁吹毛求疵、精益求精、專注、用心?從一碗麵我睇到一個民族性,呢種精神喺邊度嚟?喺中國嚟,可惜係舊中國嚟,依家冇咯,所謂禮失求諸野,但我哋又唔肯跟人學,日本人喺度,靜晒,一走,吱吱喳喳!根本唔覺得呢種專注精神重要。唔專注,其實反映咗唔多尊重,對自己唔尊重,對食物唔尊重,對自己嘅人生都冇乜所謂…… 曾經有一位日本友人話我知,食刺身要講究情緒,就係板前師傅切魚鯨時所注入嘅精神。嘩!好抽象,咁勁?無錯,精神鬆散,切塊魚都唔好食,呢種就係禪宗嘅精神,禪宗對日本文化影響深遠,煮物講精神,空手道、插花、下棋、書法、茶道、武士道,以至百貨公司服務員幫你包聖誕禮物,無一不講究呢種精神(近年日本人都好似差咗),就係因為有呢種近乎禪定嘅專注,但係我哋認為既木獨又無聊,覺得吹下水使死咩呢種精神,碗麵先可以咁好食,賣到咁貴。果然,碗麵嚟咗,淡嘅?  「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角。香港演藝學院校友會副主席

2015-01-08

在藝員訓練班嘅時候,我21歲,聽講香港準備開一間演藝學院,入面嘅戲劇學院有演技學。嗰陣,演技呢樣嘢對我嚟講,簡直係如來神掌,神秘到不得了,我偶像馬龍白蘭度就係學咗方法演技先識飛嘅,起碼我當時相信係咁。 於是我決定學院一收生就去報讀,即刻開始周圍打聽學院幾時開、點報名、有乜入學要求,又走去問King sir,因為知佢將會做院長,King sir好鼓勵我,叫我試下考。當然,咁樣周圍問,一定會有好多人知我想去讀書、學戲,於是就遇到唔少冷水,有大明星前來話「學嚟做乜?」又話,「做戲唔使學嘅,而且冇前途。」我話,都未聽過有樣專業係唔使學嘅,冇前途你又做?有劇壇前輩話:「使乜入去讀呀,跟我學啦!」跟你學有個好有錢嘅老婆?兼俾我知道呢條友冇料到,又有行家話:「學理論呀?冇用嘅,你依家咪做得幾好,讀完咪又係做明星?」我又見到佢唔單止唔識理論,連演戲都唔掂,仲目光短淺㖭。只有一個人,羅樂林先生有一次坐喺我身邊,用一把長輩關懷後輩嘅溫柔聲音,細細聲同我講:「後生仔,讀多啲書好嘅。」所以我後來攞影帝嘅時候,喺台上多謝佢,但係又冇講出前因,搞到大家莫名其妙,唔知叉燒包影帝做乜要多謝羅樂林?哈! 千方百計,千辛萬苦考入去,當時家窮,母親又冇錢,自己又冇用,月入得嗰千二蚊,最後問人借,還咗5年,最後一關連擔保都冇人幫,親戚冷言冷語:「讀乜鬼吖,兩個月就俾人趕走啦。」契爺都叫我阿媽唔好俾我讀,話讀完書佢就會識諗嘢,佢就會乜都唔做。諗乜㗎佢哋? 終於……終於搵咗一個我死鬼老竇嘅老友「楊先生」,佢係個太平紳士、二戰英雄,佢肯幫我,簽擔保信嗰日約咗喺街邊等佢架車,佢落車幫我簽名,一邊簽一邊同我講:「我唔容易幫人擔保,你要俾心機讀,呢個世界冇免費午餐。」我好多謝、好感激幫過我同鼓勵過我嘅人,特別係我媽媽,佢一直都Stand by me。  黃秋生-「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角。香港演藝學院校友會副主席

2014-11-20

戲劇是甚麼?或問戲劇有甚麼作用?戲劇研究學甚麼?學戲劇到底在學些甚麼?以上的題目都大同小異,但都指向同一個方向,悶! 我不喜歡理論,更加不喜歡高談理論,但若要深切地理解一種學問,卻又離不開理論,今日即管同大家講下耶穌。 戲劇,在一般人心目中,大概便是娛樂吧?尤其是香港人,經過多年來大量的娛樂電影及電視劇的洗禮,產品大多是故事情、劇情性的Melo drama,通俗的、帝皇將相、武俠神怪、奇情科幻,雖然記錄了當時人的生活風貌,可惜多數流於用戲劇說說故事的層面。 我當然不認為戲劇只應該說教,但亦不同意戲劇只用於娛樂。戲劇應該是包着糖衣的藥,可惜多數影視作品只是包着糖衣的毒藥,對人的精神提升一點用處都沒有。這只是我個人的見解,大家不必認同,其實我並非犬儒,我的法國戲劇老師曾經說過:「我們不會經常講道理,我們只是偶然講一點道理。」我十分認同,只希望可以偶然講一點小小的道理,不用停不了的屎尿屁。其實誰願意去看一個開場第一句便是亞里士多德,然後是詩學、三一律及歌德的演出?從頭到尾一堆悶棍,然後帶著沉重的心情回家? 簡單地回答,戲劇到底在研究甚麼呢?人,除了人本身外便沒有其他了,延伸出來是人與人的關係、人和自然的關係等等,但歸根結底還是人。戲劇和哲學很相像,哲學永遠只提出問題,到現時為止,好像沒有哪一個哲學流派,可以為自己所提出的問題作出滿意而終極的答案。戲劇一樣,總是提出問題,各種各樣的問題,家庭問題、社會問題、愛情問題,但表達方法卻比哲學有趣多了。戲劇是通過表演說故事,講道理、表達思想和理念,戲劇並且是集體創作,劇本、表演、化妝、服裝、道具、建築、繪畫、燈光、音效,有文學的、有科學的。複雜而有趣,把觀眾帶進幻想世界,用甜美夢幻引導心靈的敞開,然後帶著殘留影像,回家慢慢思考。這,便是戲劇的魔力。  「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角。香港演藝學院校友會副主席

2014-07-31

我時常在想,到底我的工作對社會、對人類有甚麼意義?有甚麼價值?這念頭二十多年來不斷在我腦海內閃現,無論拍電影、電視或演舞台劇,看著一群由數十到過百的各部門專業工作人員,在現場煞有介事地跑來跑去,大呼小叫,有時真像打仗一樣,與天氣鬥、與環境鬥,爭分奪秒,我坐在一旁想著,到底他們知不知道自己在做甚麼?我們的工作都是虛的,我們的生產很快便變成回憶,沒有實體。電視,一個月播完;電影?四星期?舞台更慘淡,二十場已經不得了,有的還可留有錄像,大多數連影也沒有,每一次工作,每一次演出都是一群人一起經歴的一次生死。 但是,隨著歲月推移,年齡增長,越來越看清事物的本相,戲劇表演,一點也不比其他學科差,我們賣的是甚麼?我們賣的是夢。 人類的文明,可說從夢開始。人類和其他生物不同者,亦是有夢,不單止有夢,我們還有能力把夢記住,把它變成現實,變成具體。 說戲劇表演的最低層次是娛樂吧,但單是娛樂已不簡單,你可想像一個沒有娛樂的世界嗎?再提升的是透過娛樂說說道理,莎翁是一例,再者更有政治、宗教、哲學的探討,存在的、未存在的、想像的、具像的,五花八門。人類的所有文明,都是從夢開始,所以,我們的工作範疇,叫「夢工場」。 「神戲劇場」藝術總監,香港藝術發展局戲劇界代表,兩奪香港電影金像獎最佳男主角及最佳男配角。  

/136



C觀點

中原城市領先指數

廚神

旅遊