糧草先行 - 士兵
2015-01-16

日圓6.5算嘅威力有幾大？觀乎身邊的同事、朋友、親戚都去日本就知，就連我其中一個民族主義兼打倒軍國主義兼極怕輻射兼驚去完返來生唔到仔的朋友乜先生(但佢話咗唔生仔)，亦忽然有日WhatsApp問我：「喂士兵，我下月去東京呀，你成日去日本，有咩好嘢食先？」「你唔係話驚輻射咩？」「円跌嘛，去幾日冇事嘅！」「嗱～咁我介紹番先，你去返www.am730.com.hk，入到去click番我個專欄糧草先行，都寫過啲㗎！」「睇過晒啦，冇涉谷喎？我住涉谷呀！」「咁……就去我喺涉谷嘅飯堂d47吧！」原來，消除核輻射威脅嘅最佳辦法，係匯率！安倍，你好嘢！ 涉谷Hikarie 8樓的「8/」，共劃分為七間shop，由畫廊、博物館、藝術展覽、食堂和生活商品等組成(01至07)，其中04～06的「d47Museum」、「d47design travel store」和「d47食堂」，由日本平面設計師長岡賢明的D&Department所創立，當中的「d47」代表了全日本「一都、一道、二府與四十三縣」合共四十七部的意思。其意念是透過飲食觀光購物，讓你認識日本四十七個地方的不同地域文化。 04「d47Museum」入場無料──每個展覽期約兩個月(到訪當日的主題為山形縣)，由畫作、雕刻，到遠古時期的煮食器具、農民耕種所使用的工具等，分別放在47張枱上展示，將山形縣整個歷史變遷一次過晒冷，如果每兩個月來一次，大概花7.8年就可以看完全部47個地方了(祈求円繼續跌跌跌跌跌)。 05「d47design travel store」──入場雖然無料(免費)，但所有生活雜貨足以令你申請破產。全國精選的木製杯碗碟、清酒、食材及紀念品應有盡有，件件高雅精緻，買番幾套放屋企，真係突顯生活品味，好過你成屋七彩Le箍set囉。 06 「d47食堂」──睇完展覽買完嘢，當然要醫下個肚。d47的menu以定食作主打，包括主菜、飯、漬物和湯，有四至五款不等(menu每月更新)，定食均用各個縣市命名，非常精緻；除了定食以外亦提供單點食物、酒類、甜品，其實是集齊了全國最優質食材，如果你個胃夠食力荷包夠實力，可以一次過吞晒成個日本落肚；而我實力有限，當日只吞咗島根和山形兩個縣咁大把。 日本人，最叻就係將一啲睇落冇乜特別嘢嘅，重新集合一齊經設計過後又變得有啲嘢、而嗰啲嘢又令你覺得好有品味，食買睇完之後立即成為品味達人，而D&Department的長岡賢明完美地示範一次何謂「生活品味的正確設計」。 Hikarie d47 地址：東京都涉谷區谷2-21-1 8F 電話：03-6427-2303　營業時間：11: 00~23: 00 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2014-11-21

以下是真人真事：「唔該我想叫嘢食！」「唔好意思我哋酒吧冇嘢食提供。」「吓？唔係嘛……」「如果你想食我哋可以幫你叫外賣。」「吓？唔係嘛…x2」「提番你先，因為人多可能要等45分鐘！」「吓？唔係嘛……x3」最後，難食的炸薯條雞翼魚蛋燒賣當然係成粒鐘之後先到，非常無癮。所以饞咀的我近年很少光顧酒吧，因為永遠冇啖好食，不過，當你去過Hikari Bartaurant之後，「酒吧永遠冇啖好食」呢句嘢，要收番。 令我收番呢句說話的，就是Hikari的大廚沼田和浩先生。出身於日本茨城縣的沼田和浩，20歲入讀日本料理學校，畢業之後，曾在神奈川懷石料理店隱れ里車屋及澳洲鱒屋工作多年，一直鑽研懷石料理，對洋食亦十分熟悉。他將懷石料理融入酒吧小吃當中，以a la carte形式推出，加上一個親民的名字「KaisekiBar Cuisine」，令更多人可以認識懷石料理。 Hikari除了供應清酒、燒酎、雞尾酒、烈酒，最令我神魂顛倒的，是一杯冰凍的Suntory Premium Malts頂級生啤。這款生啤由泵、喉、以至酒，整套設備都從日本直送，全港只得兩間酒吧有供應，非常罕有；Suntory對酒吧要求極高，設備必須定期按程序清洗，而該套啤酒喉價錢超過五位數字，Hikari能夠有得賣，足證絕非等閒之輩。啤酒大口喝下，入口清爽兼滑順，啤酒緩緩滑落喉嚨後再有回甘，只有優質水才有這種效果，$72/杯我覺得超值，以後想落吧睇波又有啖好食，Hikari係我首選。 攝影：阿鼻 Hikari Bartaurant 地址：灣仔謝斐道415-421號積褔大廈地下B-C舖 電話：2808 0292 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2014-08-29

「今次落唔落築地呀？就嚟拆喎！」「落！」這條問題，是近年我每次飛東京前的必答題，雖然話搬話搬都仲未搬(2016年搬去豊洲)，最近還傳出原址會起賭場。其實無論幾時搬，場內場外市場會否保留等問題無謂深究，盡量爭取時間去食多幾次便可，不過，我的寶貴時間，是不會用來排隊的，尤其那兩間人龍超長的壽司大&壽司大和，動輒排上兩三四小時，每次經過不禁問：「乜東京得呢兩間壽司店咩？」識食，一定好似我咁食，排隊？仲耐過等到真普選啦！ 1.きつねや 極具人氣的狐屋，門口永遠擠滿人，為的就是一碗牛雜飯(800円)，牛雜中有腸，筋肉等，湯汁濃郁中帶點香甜，配上香蔥與白飯，完全是老江戶味道，真正庶民美食，每次入築地前必吃，冬天風味更佳！(店內老婆婆長期黑面，很有性格。)  2.大定 有80年歷史的大定玉子燒，採用千葉縣地養卵，低膽固醇，我最喜歡熱辣辣即做的原味蛋捲玉子燒(100円)，蛋味香濃兼帶甜味，真的會吃上癮變成蛋癡。 3.かとう 由老闆娘荒井美代子主理的かとう，店內所有魚類即叫即煮，需耐心等候，而我的主菜就是汁煮喜知次(3,800円、定食加450円)，熱騰騰的喜知次上桌時，微甜的醬油香氣隨著輕煙飄來，入口鮮嫩魚油極重，膠質豐富的魚皮有彈性，背脊魚鰭位置最多油，加上魚肝與豆腐，十級好食。另有海中鵝肝之稱的鮟魚康魚肝(1,500円)也是必點，軟綿甘香，好吃到不能。喜知次+鮟魚康魚肝做早餐=好食到世界盡頭。 4.東源正久 築地有好幾間廚刀店，每一間都歷史悠久，而鑄造師源正久融合了西方廚刀與日本明治時代的傳統鑄劍工藝技術，鋒利無比，買回港使用過之後，你會明白咩叫庖丁解牛。(約1萬円) 5.壽司清 來築地點都要吃件壽司，不過排隊同唔排隊之間冇中間地帶，我選擇去壽司清，因為1.唔使排隊；2.唔使排隊；3.唔使排隊；排隊？排得嚟我已經去勻全部。 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2014-07-11

每次到東京玩，都離不開血拼血拼再血拼，不過近年心態開始轉變，現在去親東京變成食為先，而且呢種食，仲要係慢食，即係要花上幾個鐘頭那種，喺東京用幾個鐘食嘢唔買嘢，潮人聽到，實會不禁倒抽一口涼氣，而令我捨得花幾小時慢食的，就是你─天婦羅大師早乙女哲哉。 唓，炸嘢之嘛，有幾好食？如果你咁諗，真係大錯特錯，天婦羅喺日本，屬於江戶前三大料理之一，其餘兩種就是壽司和鰻魚，而每一種都有一個「神」，壽司之神小野二郎、鰻魚之神金本兼次郎，而天婦羅之神，就是早乙女哲哉。 現年67歲的早乙女哲哉，能成為日本天婦羅料理界一代巨匠，離不開努力與天分，15歲開始造天婦羅的他到29歲時，已在東京日本橋茅場町開設第一間店，至今34年，奮力了半個世紀，其間不斷在技術、材料上追求完美，到09年交給兒子早乙女具視打理；而這間位於東京都江東區門前仲町的「美川是山居」，是早乙女哲哉及多位現代藝術家由樓高四層的住宅改裝而成，除了頂層起居室外，另外兩層為客室和展覽室，地下就是早乙女的表演舞台，店內的餐具，是用近百位名家所做的陶瓷器作品，件件價值不菲；menu由早乙女用水墨親手繪製，加上用銅造成的帽形抽油煙機，美川是山居真係似藝術館多過餐聽，近乎完美的藝術品味。 ‧前菜─19:00　毫不起眼的前菜，驟眼睇還以為右邊是豚肉，一放入口魚油四濺，原來是吞拿魚腩，oi shi i~前菜好與壞會直接影響之後用餐觀感，我俾九十分。 ‧車海老─19:20　由徒弟負責剝殼，一手一隻技巧純熟，去腸去筋避免鬈曲，不消一會車海老已放在眼前，蘸點海鹽放入口，OMG，酥脆非常，半熟的蝦肉爽彈甜美兼帶點麻油香，而蝦頭的蝦味非常香甜，久違了的蝦味，好吃得想流淚。 ‧沙梭─19:50　來自東京灣，淡白色的她，味道纖細口感酥軟，魚，唔一定貴先好食。 ‧墨魚─20:10　喺香港成日食椒鹽鮮魷，慣咗大啖咬，咦？這是甚麼感覺？除咗炸醬，裡頭又軟又嫩，中心呈半生的透明狀態，非常神奇，朋友與我四目交投，彼此流露出驚訝表情！ ‧紫蘇海膽─20:30　海膽來自北海道，用兩片紫蘇葉包住，撲些許粉炸，甜美依然，但還是吃刺身較佳。 ‧白飯魚─20:45　細細條易過熟，油溫控制一流，再次印證魚唔一定貴先好食。 ‧穴子─21:10　海鰻，高溫炸熟，雖然油分較多，但極淡的胡麻油發揮作用，油較重但不膩，肉質綿密。 ‧貝柱餅─21:30　應該是帶子嗰粒掟嚟，下鑊炸時再用筷子集中一齊，非常考功夫，入口還以為會韌，殊不知又甜又軟又脆，加上醬油白飯，壓軸出場的果然是皇牌。 吃罷甜品，還上了二、三樓參觀，四周放滿畫作、雕塑、陶瓷，加上清酒影響，實在令人陶醉；由六點幾入座到近十時才埋單，連兩瓶清酒，四萬円有找(兩位)，非常超值。如果當時選擇用幾個鐘買嘢唔食嘢，不禁倒抽一口涼氣嗰個，一定係我。 みかわ是山居 地址：東京都江東區福住1-3-1 03-3643-8383 營業時間： 11:30～13:30 17:00～21:30 定休日：水曜日 士兵~饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2014-06-06

身為一個酒鬼，每逢食日本嘢，飲日本酒(清酒)係定律嚟，因為易入口，喝多了也不自覺，宿醉頭痛亦隨之而來；不過自從上月中認識了香港首位日本燒酎品酒師杉內馨(Kei San)，呢個定律要改寫。 「喺居酒屋，日本人而家好興飲燒酎(音：就)，因為佢嘅原材料係番薯，屬於無糖分嘅蒸餾酒，所以零糖分兼且零卡路里，就算糖尿病人都可以飲用，不過佢酒精度較清酒高。」Kei San邊喝邊說。我先嘗了一口八千代伝黑麴，酒精味道沒有想像般濃烈，反而番薯的甜香在舌頭慢慢滲出來。「燒酎飲法亦變化多端，好似士兵你呢個酒鬼可以淨飲啦，其實佢可以加冰、加熱水、或者做Cocktail都得，但清酒就唔得，加上飲多都唔會宿醉頭痛，所以燒酎好受日本人歡迎。」Kei San補充說。 位於尖沙咀的博多道場最近就同八千代伝來個Crossover，為一眾燒酎初心者提供Pairing Set(自選三款燒酎，每杯約60ml) 燒酎佐酒肉食三點  $148 煙肉蝦丸─炸物，香口+微辣=要飲多兩杯黑麴。 鹽豚─鹽醃，慢煮+津輕豚=嗒兩啖千代吉。 博多醋味滑牛腸─內臟，脂肪+煙韌=配白麴最襯。 燒酎佐食海鮮三點  $148 元貝腐皮包─鮮味，元貝+秋葵=淺嘗白麴。 魷魚鹽辛芝士─鹹香，魷魚+芝士=足以KO半支黑麴。 白飯魚苗青椒仔─魚香，青椒+魚乾=千之飛躍半杯。 青森縣產津輕豚肉鍋 $248 津輕豚肉脂肪位夠多，用中小火輕輕灼熟最佳，入口肥而不膩，肉質軟滑甜美，一口酒一口肉，妙絕。   神屋流博多道場─尖沙咀店 地址：尖沙咀金馬倫道5號太興廣場3樓 電話：2312 6922 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk  杉內馨 Kei San 香港首位日本燒酎品酒師 原籍日本北海道的Kei San，居港多年，廣東話「lak lak」聲，非常親切，對日本食材瞭如指掌，尤其對日本酒甚有研究，最近仲取得日本FBO及SSI 頒發「燒酎唎酒師」及「燒酎品質鑑定士」資格，wine sommelier一街都係，燒酎sommelier暫時只此一家，跟佢飲，冇死錯人。  八千代伝燒酎 1928年由第一代創辦人八木榮吉建立「八千代釀造元」，位於鹿兒島垂水市的猿城溪谷深山(日本國家保護林區)，環境優良，雖知道肥沃的土壤、水源，是酒廠的命根，所以八千代伝用自家種植的番薯來釀酒，風味獨特味道醇厚。而年僅27歲二代目杜氏八木大次郎(圖)釀製的八千代伝(黑)，榮獲2013年鹿兒島縣燒酎鑑評會的「杜氏代表賞」，年紀輕輕已令全國注目，すごい！

2014-03-21

上次到Le Mieux Bistro吃飯，已是多年前的事，印象卻非常深刻，因大廚Ricky Cheung烹調法國菜的技巧非常紮實，比那些洋鬼廚子猶有過之，加上同聲同氣，味道、感覺都份外親切，只不過要山長水遠走入柴灣工業邨，實在不就腳；及後轉戰灣仔，亦因為種種理由未有再訪。某日PR老友來電：「喂士兵，Ricky嗰度有新a la carte menu喎，嚟唔嚟試？」二話不說：「即到。」終於有緣重聚。 Le Mieux Bistro今次推出的新菜式，特別注入法國南部地方菜的特色，多以海產為主(普羅旺斯近地中海嘛)，亦有鴨髀、牛肉等經典傳統法國菜，價錢大眾化，碟碟分量都大到可以幾個朋友/飯腳share，一人「畢」一啲大口大口地吃，感覺倒有點像在吃意大利菜；而且每道菜都已pair咗最夾的紅、白或氣泡酒(另售)，每人三幾百就吃到Ricky的一流手勢，無論是相機食先或人食先，都非常划算。 1.香焗酥皮合桃蘋果芝士卷$145──選用brie芝士製作，但保證你認不出來，原來brie焗過之後會是如此超重口味，那啖芝士味幾日後仍然recall得番。 2.香辣吞拿魚尼斯沙律、法國邊豆、風乾番茄及鯷魚汁$145─極開胃的法南前菜，吞拿和鯷魚都事先醃過，灑上鯷魚紅酒醋汁，醒腦提神。 3.紅酒燴三寶：牛脷、牛月展及牛尾$210─其實，食完這個菜，我的人生只剩下一個問題：「個牛脷究竟係點整先可以整到咁好食？？」 4.傳統法式薄餅：番茄、橄欖、焦糖洋蔥及銀魚柳$145─有別於大量使用番茄的意式薄餅，pissaladiere用上慢火煮的洋蔥做底，配上鯷魚柳，叫人爭崩頭。 5.初榨橄欖油羅勒煮花蜆、藍青口及海蝦$165─海蝦海蜆用本地的，藍青口來自法蘭西，但重點不是用甚麼海鮮而是那啖湯，你要自己去試試才知一二。 6.香鴨油慢煮法國鴨髀配洋蔥、菠菜及薯蓉$195─是日主角，由醃製、慢煮、油封、香煎到上桌，前後花掉Ricky三日三夜，真正的心機工夫菜，好食到唔識講。 7.香煎地中海紅線魚配南部燴菜及香草汁$215─紅線魚魚身明明偏瘦，卻煎得嫩滑多汁，外皮香口，四件點夠？ 8.酥皮拿破崙$85─即叫即做，不用傳統的三層酥皮夾兩層奶油，改用72%法國朱古力慕絲做「餡」。吃到這裡我已飽到黐線，Ricky還端出這最後大佬，實在要命。 士兵-饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2013-11-22

我一向很少在香港吃壽司，因為每年都飛日本，在當地吃，壽司刺身要幾新鮮都有；不過當壽司癮發作時，總不能立即飛去築地，唯有想辦法解決，而「千両」正是我的解藥，因為他的定位完全Tag中我這種又要新鮮又要質素又要價錢合理的奄尖顧客，最近更推出每位$380的晚市Omakase(即廚師發辦)，連食乜都唔使諗，只用胃袋不用腦袋，一樂也！ 1. 前菜：一口和牛、油甘魚伴蒜麵豉、鰻魚蛋卷──和牛入口即溶；油甘魚伴蒜面豉蒜味濃烈，喜歡吃蒜的一定鍾意；鰻魚+蛋從來都是絕配，這個前菜我俾九十分。 2. 精選刺身：吞拿魚腩、牡丹蝦、三文魚腩、時令築地魚兩款(伊佐目、縞鰺)──一入口就知全部新鮮貨，尤其那件吞拿魚腩，像吃脂肪般，在口腔內慢慢溶化，坊間收你咁貴，有原因的。 3. 和風煮物：精選築地時令煮魚(油甘魚鮫)──汁煮有時會過鹹，但這裡味道控制得好好，魚鮫亦夠肥美。 4. 燒物：海膽醬燒赤海蝦──海蝦開邊加海膽醬原隻燒熟，蝦頭部分的蝦膏沾滿海膽醬，甘香非常，加上肉質爽彈，一隻點夠喉，幾乎想吃埋友人嗰隻。 5. 精選築地時令壽司四款──每款壽司都配上不同醬料，味道非常獨特，比蘸豉油Wasabi來得有新鮮感，而那件鯖魚壽司更令人一吃難忘。 6. 稻庭烏冬：正當驚唔飽之際，侍應送上烏冬乙碗，烏冬入口煙韌木魚夠香，食完立即飽咗九成。 7. 吸物：和風清酒煮蜆湯──清酒的甜再加上蜆肉，甜上加甜，簡單美味。 8. 甜品：雪糕糯米糍──分量頗大，味道比乜記的好吃一百倍，為Omakase劃上完美句號。 千両：尖沙咀彌敦道19-21號九龍酒店B3層B3-01號店   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk  

2013-10-25

香港好多人做生意，都喜歡一窩蜂，尤其係飲食業，邊樣受歡迎就立即跟風，由早期的台式珍珠奶茶舖到近年日式拉麵店，其實熱潮一過，執笠可期。 不過總有人反其道而行，所謂人棄我取，人取我與，像「茶木」，走休閒路線，裝潢優雅，主打新派台式輕食，一碟招牌甜品蜜糖磚塊，很受年輕情侶，學生妹歡迎，幾乎每枱必叫，實在是溝女必備item，可惜當日我們一行三個麻甩佬share一碟，情何以堪。 至於其他輕食，亦十分出色，首推阿嫲手作蔥油麵，麵條每日鮮製，屬粗身類別，入口帶嚼勁，伴以大量蔥油蝦米花生等乾撈，簡單美味；如果怕食完有口氣，對住囡囡驚失儀的話，還有西式麵食海鱸魚奶油意式手作麵供選擇，每條麵滲滿奶油，掛汁力強勁，相當好吃。除了麵食，另外一碗蚵嗲肉碎泡飯亦要強力推介，蠔仔粒粒鮮甜兼肥大飽滿，配大量肉碎+菇粒+魷魚+香荽，比坊間一般好吃得多，食完第一口即刻想再添，完全唔想同朋友分享。食物質素好，有gimmick的「茶木」，一年內連開三間，是有原因的，以後想舒舒服服喝杯珍珠奶茶，又多了一個好地方。 茶木：銅鑼灣軒尼詩道489號銅鑼灣廣場一期6樓A舖 電話：2836 5600   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk  

2013-03-22

每年唔去日本就唔安樂，今年亦唔例外，但去得關東關西多都厭，唔想買嘢，純粹地只想搵好東西吃，沖繩是不二之選。整個搵食旅程，以幫襯特色小店為主，盡量將大集團及旅遊書有介紹的餐廳剔除，竟然給我遇上了兩個美女廚房，一個樣子甜美，一個神乎其技，原來去到邊都反集團霸權，係有好報的。   沖繩北部國頭郡的古宇利島，四面環海景色靚絕兼海產豐富，尤其係海膽特別出名，當然要到這小島走走，在大橋附近發現一間橙色小店，門口有個男仔大嗌口號拉客，就這樣亂闖之下遇到了第一位美女。 來自埼玉縣的原田優美，廿幾歲，Konrijima Cafe店長，喺埼玉縣辭工後來沖繩旅遊，點知愛上了古宇利島，開頭喺度做part-time，感覺到大家每日都好努力工作，漸漸被古宇利島嘅人感動咗，決定留低喺古宇利島一齊努力成長，透過不同經驗變成更成熟的人，最後更成為Konrijima Cafe店長，典型日劇勵志故事。至於門口的那位，是神奈川出身的葉津木涼；幾個後生仔搞cafe，做小生意，是很多人的夢想，同樣嘅故事想喺香港發生，簡直係天方夜譚，令人欷歔。   另一個外島伊江島，除咗海產，最出名就係伊江牛，由本部港坐船只需半小時，但班次疏落(見表)，來玩半天還是足夠的，落船後往右邊方向行去景點城山，沿途沒有風景，但有田有貓有牛欄，可一睹伊江牛風采，當日對住我仲叫得好大聲，可能知道我陣間會食佢啲friend。 伊江島鄉土料理店「友小」，小店格局，開業十多年，由萩原小姐主理，一頭銀髮的她笑容親切，所有食物由她親自下廚，主打的伊江牛定食相當受歡迎，價錢由1,200円至4,000円不等；等候食物時四處參觀，發現牆上貼滿萩原小姐的照片，旁邊擺放了幾個三線，最後萩原小姐更為我們高歌一曲，人情味滿分，沖繩，我愛定你了。想睇萩原小姐邊彈邊唱的話，請留意am730 facebook專頁。 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk  

2012-10-26

2012年除了倫敦奧運，德國ERFURT也有奧運舉行(第廿三屆IKA奧林匹克烹飪大賽)，前者運動後者飲食，原來大家都是四年才舉辦一次，第一屆於1900年舉行至今，而香港廚師協會今屆派出6位廚師代表香港參賽，全部來自各大酒店及餐廳；9月尾收到PR老友來電可率先試菜，連我這個一向不出席邀請飯局的飲食怪人也立即應約，為香港飲食界推廣一下，應該的。 三款參戰菜式包括： 頭盤─海鱸魚，三文魚及鮮蠔暖批配法國藍龍蝦香腸，蟹肉丸子伴辣根泡沫：暖批分三層，上層鱸魚中間鮮蠔肉下層三文魚，三款食材各有性格，味道分明，但食落感覺卻十分融合，配搭盡見功力；蟹肉丸子外表脆口，肉裡蟹肉分量十足，有別於一般炸物；龍蝦香腸看似平平無奇，入口蝦味濃烈，恍似吞了整隻龍蝦在肚內。這條腸，我低估了你，對不起。 主菜─乳豚三重奏(脆豬腩肉、豬肋、豬臉頰)、汁煮甘藍及薯塊、伴蘋果芹根蓉、鼠尾草及蘋果酒汁：先說豬肋，外邊烤焗至微脆，兼帶點Spicy而肉汁又夠多肉質又夠腍，好吃好吃，直情想用手拎起食，但失儀嘛，諗下算了；脆豬腩肉其實係燒肉，OK啦，點都不及永合隆，um......應該係用來應付外國評判的，計算準確；豬臉頰用薯塊包裹著，內藏大量肉碎，味道濃而不膩，不俗。 甜品─香梨檸檬慕絲球、柚子雪糕伴杏仁開心果脆餅：柚子雪糕味道清新，頓時肥膩感大減，食完主菜最佳配搭；香梨檸檬慕絲球賣相精緻，入口層次豐富，甜度控制一流，脆餅亦好吃，而碟上有兩顆小東西，以為是糖，原來帶點酒味的，為甜品加多一重驚喜。   重新演繹─不是有得睇冇得食的，由即日至本月31日，THE EAST旗下的La Cucina Italiana及Zummer，將頭盤及主菜兩款菜式，稍作微調推出，價錢相宜，令大家可以一嘗奧林匹克烹飪大賽的國際級菜式，三道菜分別有「三文魚，鵝肝及鱈魚暖批配香草龍蝦汁及辣根泡沫」(圖1)、「香烤豬肋配蘋果芹根蓉，脆炸鼠尾草配蘋果酒豚肉燒汁」(圖2)及「精選甜品」，定價$458一位，其實相當抵食，四年一次，應該去試試。 逢星期一至四夜晚由La Cucina Italiana供應   地址：皇后大道東202號QRE Plaza 21-22樓 逢星期五至日夜晚Zummer供應    地址：皇后大道東202號QRE Plaza 23及25樓 溫馨提示：凡惠顧THE EAST旗下餐廳消費滿＄300，可於合和中心免費泊車14小時(由傍晚6時至翌日早上8時)，真係駕車去食晚飯飲兩杯啤酒都唔使驚，可以放低架車安心搭車歸家，波叔下次食飯不妨諗諗。   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2012-10-19

一向對大型或連鎖美式西餐廳帶點抗拒，甚麼「加州」「星期二」「薄餅」，食物來來去去都是Ribs＋Steak＋Spaghetti＋Pizza毫無新意，質素與味道一般，可能因為大大碟，飲品任添，價錢亦算合理，所以當有朋友聚會，很多時他們也會選擇連鎖西餐廳，而我縱使不情不願都要奉陪兼笑住嚟食，你知啦，依家PR全球化，得罪朋友死路一條。 話說早前又有朋友生日(一年總有三五七八九次)，又選擇連鎖西餐廳，去銅鑼灣OUTBACK吖？我當然係話：好吖，橫掂未試過，無所謂，其實心裡涼了一截，因為是日晚餐又可能會變成維持生命的飼料。殊不知驚喜來了，打開餐牌當然係Ribs＋Steak＋Spaghetti等大路貨式，當然每樣叫一些，第一口黑糖麵包，雙眼一瞪，OK喎，再來一塊肉眼扒更不得了，無論生熟度牛味都很有水準，十分好吃，需知道我是個牛癡，對牛扒有一定要求，OUTBACK牛扒令我數月內食咗三次(不同分店)，連鎖西餐廳，我對你有少少改觀了。   以下是三顧扒廬情況： 1st顧：銅鑼灣店，order價錢較平的普通ribeye$198(配菜選了焗甜番薯＋特色雞味飯)，就算難吃亦不會太肉赤，侍應問要幾成熟，當然是medium(雖知道半生熟係最好食)，牛扒上桌，無格仔紋，賣相亦很一般，一落刀卻輕易切開，生熟程度剛好，入口充滿肉汁夠牛味，毫無嚡口感覺，質素好好，可惜番薯味道平平無奇，雞味飯還可以，二百塊錢好抵食。 2nd顧：尖東店，朋友想吃蟹腳，肉眼配蟹腳組合$268(配菜選了雜菜＋特色雞味飯)當然order了medium，生熟程度和第一次差不多，入口肉汁充盈，肉質軟腍夠肥，水準和銅鑼灣店如出一轍，未吃完已經想再來，但蟹腳就…… 3rd顧：尖沙咀彌敦道店，吃了兩次肉眼，今次決定叫最貴的USDA Prime Steak西冷$228(配菜選了炸薯條＋雜菜)，order了medium，老實說，賣相很raw，生熟程度卻是最佳，一切開內裡嫩紅色，入口肉汁澎湃有咬口，牛肉味比肉眼更濃，外層燶位有種特別味道，應該是他們標榜的特別配方醃料，不蘸任何醬汁原味最好吃，水平直逼高級扒房，薯條亦脆口，二百餘塊錢無話可說，我覺得超值。 順帶一提，雲呢拿雪榚朱古力軟餅甜品(圖4)亦很好吃，一凍一熱的配搭天衣無縫；至於其他食物不提也罷。outback : www.outback.com.hk 饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2012-09-14

經常聽到很多人大叫食魚冇魚味，食雞冇雞味，入口味如嚼蠟，其實已司空見慣，因為魚係飼養雞係冰鮮，何來鮮味？尤其在大酒家的所謂海魚全部係食飼料大，每條動輒五、六百元，入口只有豉油味道，荒謬之極。不過唔使灰心，肯多走一步總會搵到真正海魚。 話說有一晚和友人殺入鴨脷洲珠記，一心想來個海鮮大餐，殊不知是日休息，碰了一鼻子灰，於是腦筋急轉彎，立即衝去鴨脷洲大街的「海港食家」，雖然海港食家是舊式飯店格局，兼且充滿老店舖的氣味，卻晚晚爆場(當晚六時半入座，幾乎全部訂晒枱)，因為老闆天天到魚市場入貨，極多平靚正的海魚，寶藏就放在門口的膠箱內，想揀靚魚要叫老闆出手，而他亦會親切地逐條講解，由於種類太多，名字已記不起來；我老實不客氣地揀了金鼓、三鬚、石烚………等七條雜魚(細size)清蒸，每條魚的肉質味道獨特(個人最愛三鬚)，有甜有甘有香有滑仲有骨，閉上眼慢慢細味，久違的鮮魚味道感動味蕾，剩下的魚汁加豉油可連下兩大碗白飯。 一碟蒸魚加個小菜，再加個例湯，係海港食家指定動作，每個客人也吃得開懷；魚+豉油+白飯=滿足快樂其實好簡單，令我忽然想向May姐(黃麗梅)致敬，大聲疾呼「魚！有！魚！味！」   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2012-08-03

人愈大，愈發覺自己愈似父母，個人口味盡得兩位真傳，愛喝酒愛吃辣愛吃豬油愛蘸豉油，還有好多人嫌臭的榴槤我一樣愛吃，幸好生於一個為食家庭，否則今日嫌榴槤臭嗰個，可能係我。 對於榴槤認知，只限於泰國，早年香港大部分只賣泰國榴槤，已經覺得很好吃，老媽是個榴槤癡，偶爾買個金枕頭回來，全家立即變腰果眼，真係好似執到金咁開心。不過，今年６月專程去檳城浮羅山背的榴槤園走一趟後，發現馬來西亞榴槤好吃過泰國榴槤一百倍，回不了頭！情形就好似葡萄酒，初喝便利店八十蚊澳洲貨色會覺得OK，甜吖！又易入口！但當你喝過波爾多列級酒，那種細緻與複雜性，是兩碼子的事，便利店八十蚊真係請都唔飲，泰國榴槤，我們緣盡了。 寶盛園，檳城浮羅山背最出名果園之一，盛產坤寶紅肉、青皮紅肉、D604、紅蝦、葫蘆等等，而園主Durian Sheng是寶盛園第二代，非常好客熱情，教曉大家如何品嘗，是一本榴槤活字典。 「我哋呢度榴槤樹全部幾十歲，最老嗰啲有成80年樹齡，果肉特別好吃，肉色有黄有紅，肉質黏口，甜中帶苦，苦中回甘，好似葡萄酒咁。」 Durian Sheng突然指向樹林，「我最怕啲動物嚟偷榴槤，尤其係馬騮，好難對付，射殺牠們沒用，數量太多，我哋會設陷阱捉佢哋，捉到會同佢哋噴上唔同顏色，例如紅色藍色，然後放佢哋走，回到樹林會引起哄動，保證幾個星期冇馬騮敢來，到時我啲榴槤都賣晒啦，哈哈哈哈。」 「等我教你哋揀榴槤，先搖下佢，有聲就好，肉離外殼即係熟，然後喺個椗附近聞下佢，唔會拮親，香味濃烈就最佳，果肉最近椗嗰粒最濃味。」說罷開始順序吃榴槤，由淡到濃，坤寶紅肉↓D604↓青皮紅肉↓紅蝦↓葫蘆。 見我食到變咗腰果眼，Durian Sheng突然走過來：「我教你一個食榴槤嘅新方去，因為皮夠脆，你咬開少少皮，然後大啖咁吸啜，好似飲果汁咁，啲肉會沿住喉嚨直落，咁樣食最正。」果然與別不同，全個喉嚨充滿香味，時甘時苦，朱古力味隱若滲出，after taste長到你唔信。 「食榴槤好呀，有益身體，壯陽㗎！」Durian Sheng邊說邊用食指敲木枱，在場男士一輪哈哈哈哈哈……… 短短兩小時，非常盡興，令我對榴槤有新的體會，回程時想起在另一世界的老媽，眼角不期然濕咗。 (待續)   BAO SHENG DURIAN FARM - 150 Mk.2, Sungai Pinang, 11010 Balik Pulau Penang, Malaysia 價錢：RM120 任食(Durian in Black) 前往方法：可於G hotel乘的士前往，車程約1小時，建議包車四小時，每小時收費約RM35   饞咀，成日想食好嘢，卻一星期食足五日外賣飯盒嘅am730死肥仔創作總監。 電郵：springkwok@am730.com.hk

2012-06-22

商場文化喺香港根深柢固，記得幾個月前有間爆谷商場開幕，各雜誌爭相報道，曝光率熱爆全港(包括餐牌殘體字事件)，朋友問去不去？我當然拒絕，入得將軍澳不如去西貢，行吓海邊睇吓漁民踩吓牛屎好過踩商場，又可發掘新事物，當然包括吃的；商場？我呸！尤其是大呼「尋味時光」開的。 西貢特色店子多的是，但玩到有高茶「High Tea」的實屬罕見，位於普通道的Cozy Corner，走歐洲小店路線，藍白色的門面放了一張小枱，內裡裝修雅緻，再加水晶燈藍色絨梳化，歐陸風情得很。 首推英式下午茶，材料相當豐富，鹹點有鵝肝西班牙火腿中蝦吞拿魚，亦有鬆餅朱古力慕絲芝士餅等甜點，其中由老闆娘Christine自家製作的Scone及果Jam，充滿鮮果味道，不是那些現成貨可比擬；而另一亮點係Clotted Cream，外國人吃Scone的最佳配搭，但因不能貯放太久，所以一般餐廳不會採用，味道比塗牛油好吃得多，完全是兩碼子的事，食完呷一口English Breakfast Tea，非常回味。 下午茶如此出色，當然要試試晚餐水準，即時向老闆娘訂枱再來一局，結果一樣高質素，其中的西班牙乳豬、燒西西里雞、欖油蒜片煮海蝦味道出眾，原來大廚來自酒店，曾到瑞典工作，對歐洲菜式有豐富經驗，難怪乳豬、燒雞處理手法與別不同。 實在極喜愛這小餐廳，在這裡你會看見主理人對食物的執著，吃得出的心機與人味，像走進另一個世界似的，在公式化商場你永遠找不到，這才是真正的尋味時光。   英式下午茶$338 per set(圖3) 第一層─Pan-Fried Goose Liver香煎鵝肝、Iberico Ham With Melon 西班牙火腿蜜瓜、Pan-Fried Prawn With Lemon 檸檬煎中蝦、Tuna Fillet Sandwich 吞拿魚三文治 第二層─Homemade Scones自家製4款烘鬆餅：無花果、合桃、葡萄乾及原味(Figs,Walnut,Raisins& Original Flavors)、自家製玫瑰士多啤梨果醬及牛油(Homemade Rose Strawberry Jam & Butter) 第三層─Belgium Chocolate Mousses酒香比利時朱古力慕絲、American Cheese Cakes美式芝士餅、Mascarpone Cheese Puffs意大利芝士泡芙   1.西班牙乳豬$228─招牌菜之一，用多種香草及酒醃過夜，再烤焗90分鐘，皮脆肉嫩不肥膩，需預訂。 2.欖油蒜片煮海蝦$145─西班牙Tapas之一，蝦當然夠彈，但重點係蒜油，味道濃烈，用來浸麵包吃最佳，當晚吃了三籃。 3.燒西西里雞$128─從未吃過如此入味的燒雞，大廚醃製功力到家，皮香多肉汁，友人們咬了一口，即刻order多一碟。 4.食西餐點少得葡萄酒？Ch. Pape Clement 1994(左)，之前買了88年品嘗，那種Graves個性令人愛上，今次再嘗94，香氣帶皮革煙燻，入口順滑細緻，那種礦物味道地域性最強，弱年表現算係咁，有好年份必買！Lupicaia 2007(右)，意大利Toscana，帶點辛香料香草香氣，厚酒身，入口乾身酸度夠，仲後生，令人期望幾年後再相遇，配乳豬還真不錯！(開瓶費$80)   地址：西貢普通道183號C地下(近滿記甜品)   饞咀，成日想食好嘢，卻一星期食足五日外賣飯盒嘅am730死肥仔創作總監。

/136



C觀點

中原城市領先指數

廚神

旅遊