一切由《壹週刊》開始。
作為《壹週刊》的長期讀者，當然有拜讀黎智英的專欄，文中大談人生哲理、創業及生意經等等，老實說興趣不大，反而他寫食經，每次閱畢後總是牙癢癢兼大吞口水，只不過佢有錢我冇錢，甚麼法國米芝蓮意大利名廚，食個晏都動輒開支Chateau Margaux，實在遙不可及，每次真係只係得個睇字！
上年十月他的一篇文章談到東京美食，其中一間在麻布十番的米芝蓮星級餐廳，竟然被淺草的一盒鰻魚飯與一個吉列豬扒定食給比下去，邊看邊食指大動，但冇圖冇真相，決定為食到東京。
雖然近年去了東京無數次，但上次踏足淺草已是十多年前，記得當時只到雷門留影，行行仲見世通就趕去下一站shopping，所以對淺草印象很模糊；但今趟純為吃而來，發現原來有很多好吃的店子，當然包括肥佬黎推介的鰻魚飯與豬扒飯。
川松這間百年老店，在雷門附近，分本館及別館，專賣鰻魚飯，兼標明所有鰻魚為國內(日本)產，甚受食客歡迎，而鰻魚定食有兩款；1.蒲燒定食(3,360円) 2.富貴(3,990円)，是日揀碟數較少的蒲燒定食，以留胃納；定食包括了漬物、豆腐、山藥魚生、鰻魚飯、湯、甜品等，主角當然是紅色漆盒子的鰻魚飯，一開盒已知一定堅好食，因為香氣撲鼻，兩塊鰻魚充滿光澤，入口香軟，油脂緩緩滲入味蕾，陣陣幽香布滿整個口腔，蒲燒的醬汁亦恰到好處，微微帶甜，餘韻十足；而薄薄的一層飯，每粒飯也被魚油及醬汁包住，最後一啖實在捨不得放入口。吃罷找來穿著和服的嬸嬸傾談一會，不諳日語的我，要靠同伴又寫又手語問個究竟，她說川松的鰻魚均在鹿兒島養殖，百分百日本貨，而湯中的一條不明物體，原來是鰻魚肝，加上蔥花，喝起來十分清淡，為濃濃的鰻魚飯來個調節，日本人對吃實在講究。至於豬扒定食，下回待續！
 

川松本店
地址：東京都台東區淺草1-4-1
電話：03-3841-1234
營業時間：
平日─11:30~15:00、17:00~21:00
土曜日(星期六)─11:30~21:00
祝日(公眾假期)─11:30~20:00
 

士兵
饞咀，成日想食好嘢，卻一星期食足五日外賣飯盒嘅死肥仔。
電郵：
[email protected] am730.com.hk