私房菜，從來不是我杯茶！我覺得每次吃之前都要周圍搵餐死(因為大多隱藏於民居之中)，兼且無招牌，又要一早訂位又唔做walkin，又無餐牌又唔知食乜，有部分廚子又極有性格又扮有特色，但實情是只懂得煮幾味，兼且又寸又收得貴，收得太平又唔夠膽幫襯，還要多數吃完成肚氣，實在令人氣憤，把心一橫去再興吃碗叉燒飯好過，至少不會貼錢買難受，不過凡事總有例外的。
老友推介的私房菜，令我推翻以上一切。位於尖沙咀的龍泉，暗藏於一幢舊樓的小單位內，屬一廳兩房格局，再加個狹窄的廚房，一個人做出以每位$248、$330或$508的大件夾抵食鮑參翅肚海鮮餐作招徠，兼且標榜百分百冇味精，實而不華，難怪在尖沙咀站得住腳。
老闆兼大廚何先生，客家人，閒談其間帶點激動地說，自己十幾歲入行，由最底層洗碗做起，當年冇得做就會餓死㗎嘞………(又一個捱出頭的故事)，依家做啲好食抵食價錢大眾化靚海鮮俾啲客人，全部都係熟客嚟，冇乜計啦，最緊要你哋話好食。
說句實話，最初見到菜式及價位有丁點兒戒心，吃後覺得某些菜式比一般菜館尤有過之，只做大路粵菜，沒有雕龍雕鳳，加上紮實的烹調工夫，定位相當聰明，二百多塊有齊魚蝦蟹分量十足，實在划算。每逢友人生日或節日慶祝要請食飯，龍泉是我必然選擇之一。

龍泉私房菜
尖沙咀彌敦道83-97號華源大廈AB座1號16樓B1室
電話：6083 1933
 

1.生拆蟹肉扒金山勾翅─不要期望係靚翅，但分量總算OK，夠杰身湯底帶點點火腿味。
2.花雕蛋白蒸海蟹─酒香四溢，滲滿蟹汁花雕酒的蛋白才是主角，滑一點更好，蟹肉亦鮮甜。
3.清蒸游水海斑─蒸魚時間拿捏準確，魚肉非常嫩滑，豉油有朕家庭味道，非常好吃，立即連下白飯一大碗。
4.原隻鮑魚扣山珍海味─二百幾食到鮑參翅肚，你仲投訴？BTW，我最愛的冬菇最好吃。
5.招牌三式蝦─黄金蝦略為失色，冇大牌檔的火路推鹹蛋黄，很難做得好，豉油皇蝦亦一樣，反而蝦丸最出色。
6.天下第一雞─名字太浮誇，即係芝麻雞，可幸是味道不俗。
7.金銀蒜粉絲蒸元貝─新鮮厚肉夠大隻，粉絲吸盡所有味道，好吃！其實還有菜及炒飯，亦不過不失。

士兵推介：
葡萄酒一向是我飯局好拍檔，不過今次轉轉口味，喝單一麥芽威士忌The Glenlivet 21年，酒色琥珀，聞香有木桶，微微的煙燻，入口質感細緻帶甘甜的味道，實在香醇，酒後想頭痛都幾難，要喝就喝最好的！

饞咀，成日想食好嘢，卻一星期食足五日外賣飯盒嘅死肥仔。
電郵：[email protected] am730.com.hk