糧草先行 - 士兵
平靚正
-
香茅豬扒飯$28─豬扒香茅味超濃，有肉汁又有肥膏位(小圓圖)，加上香蔥蒜片，齋睇賣相都知好食，味道比很多越南餐廳更佳，配埋秘製豉油，很快清碟。
大快樂美食中心：九龍灣景發工業中心地下 -
精美介紹，好嘢不妨一睇再睇。
-
門口冇大型招牌，慌死人知佢係大快樂。
-
秘製清湯牛腩河$37─蘿蔔清甜無渣，牛腩件件靚位，有肥有筋膜(小圓圖)，入口軟腍夠油香，帶點膠質，湯底鮮甜，河粉吸滿湯汁，令食味大增，西餐廳竟然有如此佳作，令人驚喜，下午茶必然之選。
茜廊餐廳：九龍灣德福廣場一期P8號舖 -
辣椒油，嗜辣者食牛腩的絕配組合。
-
茜廊喺九龍灣德福無人不識。
我同好多打工仔一樣，午飯以吃茶記為主，貪其「快靚正」，但近年物價飛升，加上舖租貴得驚人，利錢大減，直接令食物分量及味道走晒樣，現在得個「快」字，「靚正」？冇咗好耐啦！
回想起在九龍灣工作的日子，午飯足跡遍布淘大德褔及工業區，牛下的興記豬扒、源發蝴蝶腩、金利來小炒，日月星生炸雞髀………「靚正」味道一想起就口水直流，不過大部分在清拆後消失了，只有日月星仍然健在，至於德福及工業區，有兩個「靚正」想推介給各位。
第一個「靚正」，是在十多年前發現，當時途經九龍灣宏開道，看見一間超殘舊的快餐店叫大快樂，有幾殘？零裝修黑掹掹用摺枱，門口有小型麵檔，廚房佬唔著衫周圍走，裏頭仲有朕翕味，相信拖住港女想入去食是不可能的任務；但店裏頭有不少客人在吃碟頭飯，膽粗粗去試試，誤打誤撞之下，吃到全九龍灣最好味的香茅豬扒飯。那些年每月總要吃幾次，自從轉到灣仔工作後便與她分了手。上周五舊地重遊想來個復合，竟然變了另一間舖，還以為找錯地方，幸好認得老闆娘，細問之下原來年前大裝修，麵檔水吧及廚房連成一體，全店非常光猛兼有貼牆梳化，最重要是香茅豬扒飯味道與十年前一樣，吃罷有點感觸，食物依舊，面目全非。另一個「靚正」，是德褔商場歷史悠久的西餐廳茜廊，相信很多人食過，最出名是搽麵包的牛油，有幾掂大家心中有數，但是下午茶餐供應的清湯牛腩河，也是九龍灣最好味的，絕對可以一試，質素當然與大埔群記天后華姐仍有點距離，卻比很多專賣清湯腩店舖好吃得多，不要忘記他本身是一間西餐廳！喺德褔行完街街拎住一袋二袋，想小歇一會，又想嘆碗像樣的牛腩河，又又想坐得舒服喝杯咖啡，又又又想懶洋洋坐一會，難道你會仆去大埔天后？三十七蚊的下午茶餐，抵俾！
饞咀，成日想食好嘢，卻一星期食足五日外賣飯盒嘅死肥仔。
電郵：[email protected] am730.com.hk
列印
