2016年12月16日

 

財經茄喱啡 - 順叔
周大福迎賓(上)

2011年11月15日
  • 鄭裕彤所持周大福珠寶,傳上市集資約30億美元。(資料圖片)

   

 

早排寫開「奪命金股」,望住上游冇睇下游,竟然唔記得咗,新世界發展(017)主席鄭裕彤,袋裡面有隻收埋幾十年的「周大福」,趕緊年底前應節上市。彤叔多年來咁多筍嘢益股民,今次搣埋粒冠上明珠,拎出股市公開迎賓,順叔作為財經大戲影評人,當然要補返一飛講兩咀。
香港監管機構,咁多年強調保護散戶利益,都得個講字,簡單如新股上市過程中,散戶同大戶之間資訊的嚴重不對稱,從來冇認真正視。舉例說,新華人壽中港兩地上市,A股招股書初稿,上星期在上海交易所已經有得下載,但香港H股,紅衫魚斷估通街都係,可惜香港散戶想搵兩頁望吓都冇。
大型新股,大戶多數最少有幾個星期消化,唔好話招股文件初稿,承銷團晨早會準備好大堆研究報告派通街,再選擇性咁向傳媒發放利好消息,單刁煲到烚烚聲,臨上市前幾日,才開個記者會當係同街坊見面,如入飛就去過數,唔幫襯就過主。
好似周大福珠寶咁,聽講今個星期開始見芬佬,順叔為小股民服務,利用極有限資訊,喺呢個大戶有嘢睇散戶等糴米的空檔期,做個周大福「Pre-IPO茄哩啡研究報告」。
首先,根據今年5月,「周大福集團」網頁資料,集團總市值(Market value)約2,560億元,咁大嚿,因為除咗「周大福珠寶」之外,仲有新世界發展控股股東「周大福企業」,昨日周大福官方網頁,有關「周大福企業」的資料,已經剷走晒,剩返將在股市公開迎賓的「周大福珠寶」。
「周大福企業」係彤叔的私人投資俱樂部,本身是新世界系的控股旗艦,彤叔好多個人投資,例如狙擊佐丹奴(709)、入股中國平安保險(2318)、以至一大抽港股上市資產,呢嚿嘢,以半年前市值保守估計,最少值1,500億元,亦即係話,「周大福珠寶」如果話資產值係1,000億元的話,其實已經好誇張。
好喇,就算俾周大福資產淨值1,000億元,拎出街又賣幾多錢呢?根據承銷團班投行賓架,向傳媒吹水唔抹咀的數字,胃口大大都有,最勁吹到有40億美元(約312億港元)集資額,最近冇吹得咁大,都講緊25億至35億美元(約195億至273億港元),可以好肯定咁講,依家出街的集資數字,只係反映大股東彤叔「胃口」,同周大福珠寶真正價值冇乜太大關係,老闆彤叔同保薦人講,要30億美金,班賓架兼真正財經演員就盡做,做唔到,咪賣多少少股份出街囉,用中位數保守估計,假設集資額30億美元(約234億港元),賣一成股份,周大福珠寶市值2,330億元;賣一成半的話,市值都有1,550億元。
根據承銷團向幾家本地傳媒放風,周大福珠寶至3月底財政年度,純利唔夠40億元,如果市值1,550億元,市盈率已經38倍,市值2,330億元的話,市盈率更是58倍。嘩!大佬,「周大福」喳喎,講緊歐洲名牌Prada(1913),依家都係36倍市盈率,「幫襯周大福的同志」,真係富貴得過「穿著Prada的惡魔」?
與周大福珠寶同類型公司,如周生生(116)、六福(590)咁,近年叫做明星股之一,往績市盈率,都係20倍唔夠,但大家有冇留意,承銷團為咗講到周大福珠寶估值冇咁離譜,喺街唱緊的「估值」,其實係「2013年預測市盈率」,在18至25倍之間,聽落去冇咁誇張,荷李活都話《2012》世界末日啦,今日上市仲預測到2013年?俾個地球首席執行官你做好唔好?
唔好話用60倍往績市盈率迎賓,周大福珠寶如果做到1.5倍市盈率上市,已經相當誇張,究竟「周大福」3個字值幾多錢,周大福珠寶又坐住乜嘢資產咁矜貴,下回再續,睇睇呢間80年老字號,幾時變咗千幾二千間分店的零售巨人。
http://caijingcarefreee.blogspot.com
 

逢周一至五刊出

回首頁      列印

 

/56



C觀點

中原城市領先指數

廚神

旅遊