早前在報章看到一則新聞，說西環三寶之一的卓記粥店難敵貴租之下被迫結業，這情况每日都在發生，且愈演愈烈，小本經營默默耕耘，為街坊提供人間美味遲早成為絕唱，怎辦？我不想每天落街搵食只有「大」「美」「大」「吉」「麥」「K」「PH」等等快餐店，我要的是人情、味道，不是公式、味精。
又是一個故事，「順興」，由六十年代開始在大坑經營鐵皮屋茶檔，賣奶茶+三文治+車仔腸粉，請留意係「撈腸粉」，當年人人賣車仔麵的時候，有誰想到車仔餸撈腸粉竟然如此好吃，「順興」就憑這種創意，生意愈做愈好，一賣又是數十年，兼且養大一家幾口，好景不常，創辦人身故轉由兒子經營，可惜後來放棄了茶檔，幾近結業，幸好女兒最後肯接手，令車仔腸粉不致在大坑消失，及後亦進行了一些改革，由街搬入舖，鐵皮屋仍然保留，坐舖或踎街邊悉隨尊便。食物方面，除了保留車仔腸粉，還加入咖喱、焗飯、秘製叉燒等等，但要數最出色的，是近年加入的滑蛋系列，每碟即叫即做，令很多街外客聞風而至，令生意更上一層樓，出品亦相當穩定（因為我前後光顧三次才能吃勻），約四十塊錢有飯有飲品，仲有啫喱食，去「大」「美」「大」吃一盒焗豬價錢也差不多，但你只會吃得出剝削和銅臭的味道，在這裡你會吃得出誠意，吃得出用心。
在飲食業被大財團壟斷的今天，一些小本用心經營的食店，他們沒錢請公關推廣，沒錢請網上食評人試食宣傳，他們只有對食物的堅持，實在值得支持，共勉之。
 

滑蛋系列─有叉燒有蝦有牛肉，個人首推叉燒，順興自家醃製再交燒味舖代燒，味道偏甜，與滑蛋相當配合，每日兩點前沽清；蝦仁亦不俗，分量多，隻隻爽彈夠味，也是滑蛋的好拍檔；牛肉入口亦夠嫩，可惜肉味不足，被前兩者比下去；滑蛋系列每碟即叫即做，上枱時蛋汁仍未熟透，因為稍為過火就會嚡口，所以入口充滿濃濃蛋味兼嫩滑，加上特製的蔥花豉油（圖4小圓），很快清碟，食完還有啫喱送（圖3小圓）。

車仔腸粉─順興最歴史悠久的出品，只點了最傳統的豬腸蘿蔔豬紅，腸夠肥蘿蔔無渣夠甜豬紅挺身，腸粉吸收了汁底，一句講晒：好味。

黑椒雞扒蛋飯─雞扒卜卜脆炸得剛好，另上黑椒汁不會浸腍雞扒，碟子設計見心思，滑蛋系列以外的選擇。

順興車仔麵茶餐廳
大坑京街18號地下
（逢星期一休息）
 

士兵
饞咀，成日想食好嘢，卻一星期食足五日外賣飯盒嘅死肥仔。
電郵：[email protected] am730.com.hk