Ray手記 - Ray
商舖執位 太古城中心大變身
2016年12月13日
臨近聖誕，商場要帶動人流谷消費，梗係會換上新布置。不過，太古城中心就唔止，佢哋連啲商舖都變埋「新」，噚日該商場嘅總經理 陳綺蓮(Aileen) 就邀請傳媒午宴公布呢個最新消息，佢話嚟緊半年內會引入12間新食肆及零售商舖，到明年夏季就連UA戲院都走唔甩，預計做埋農曆新年檔期就要計劃離開，之後就由百老匯院線嘅MOViE MOViE進駐。
噚日餐後，Aileen仲帶傳媒喺商場走一圈，兩星期前先去過呢度嘅Ray都估唔到已經有咁大變化，就喺第二期溜冰場嗰邊，原本係大集團酒樓嘅舖位，已經變咗做food court，至於之前喺第一期嗰邊嘅food court則已經結業，分間成幾個舖位租俾唔同風味嘅餐廳。
Aileen話，佢哋希望提供多元化體驗俾顧客，所以由商場至街舖總共有70間食肆，亦唔係全部高檔，快快手買走食嘅都有，例如爆谷及健康果汁店等。佢仲話food court亦有新概念，玩埋短租pop-up store，每兩、三個月就轉款，依家首度進駐嘅就係獲米芝蓮推介嘅蛇王芬。
講到商場就難免要提吓零售市道，今年又話寒冬，不過Aileen話佢哋有溫和增長，過去幾個月嘅人流及銷售數字正面，今年9月與去年同期比較亦見上升，佢仲預計來年該商場嘅表現樂觀㖭。但係商戶對市況未必咁睇，有無要求減租？Aileen無正面回應，只係話會以顧客體驗為主，亦會留意市況。
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。
列印
