慾女 - 慾女
震撼13億人嘅棗皇糕
2016年12月13日
次次見親呢個題─「震撼13億人嘅乜乜乜」，就好似長輩圖咁，有超多人share同click入去睇。嗱嗱嗱，你咪又係睇緊囉！
呢個震撼13億人嘅棗皇糕，係來自怡東軒嘅出品。煙韌軟糯嘅口感，竟然一啲都唔黐牙；紅棗味香濃凸出，夾有清新的椰香，層次分明。可惜嘅係，呢個驚天地棗皇糕只限堂食(每客$55/3件)，當日碌盡人情卡外賣咗半打返公司，同事A及W食完，即刻叫我求師傅整四底俾佢。你冇睇錯，係一人四底，一啲都冇誇張！
我明，棗皇糕的確係心機嘢，蒸完一層又一層，淨係整紅棗糕嗰part已經要煮完壓蓉過篩再回鍋煮，冇得偷懶。依家唯有借呢個column打動師傅，希望嚟緊農曆新年會賣呢個好食到震撼嘅棗皇糕啦！(怡東軒 2837 6790)
am送禮勤出沒：話說小妹開咗個page，得閒同大家分享下飲飲食食，真食評，伏嘢唔介紹，唔使擔心！得閒又會送下禮物(今個星期又有喇，捕住個page有著數)同大家打好關係，抵like啦喂！搵食艱難，拍硬檔幫幫手啦！
列印
