2016年12月16日

 

金融講ED - 渾水
從誠哥對賭郵儲行講起

2016年10月04日
  • 圖為郵儲行上市,財爺曾俊華(左三)也捧場。(資料圖片)

   

 

上星期講過一些「對賭」性質的合約安排,今個星期剛好有一個孖沙出擊。李嘉誠父子及旗下3個慈善基金會透過認購股票掛鈎票據(ELN),取得相當於中國郵政儲蓄銀行(1658)H股11.62%權益。這一種ELN就是誠哥跟發行商場外對賭的合約。
 
依我理解,ELN的零售市場不算大,而且比較集中在內銀股,大概係內銀股的公眾形象相對吸引,不及細價股波幅太大,容易公平開價;而且又有押倉價值,所以用來做衍生工具對賭的underlying asset,買賣雙方都唔會有太大懷疑。今次郵儲行的上市可以話係星光熠熠,保薦人、帳簿管理人都是地球上最強的bulge bracket、中資大行,亦都只有這些超級大行的配套和網絡,才能直接跟誠哥去做這一單過百億元的對賭協議。
 
誠哥今次對賭的ELN一定比市價更吸引,條件更優厚。第一,因為單刁的額夠大,大刁有折扣是中四經濟學八股文教落的「規模效益」。第二,郵儲行屬新股,不像其他內銀股ELN有成熟的場外市場,業務表現和股價有往績可尋,因此風險一般較高,也較難量度,所以比市價平是合理的。第三,最明顯不過是今次班deal maker係要借誠哥的名人效應,因為誠哥向來少出手,今次借了個「金漆招牌」去做marketing做公關宣傳,媒體大肆報道,不知多少基金落搭入股,淨係呢樣都要計平個價俾誠哥啦。
 
因此,這也解釋了,既然誠哥真係睇郵儲行,點解唔直接做基石投資者用真錢入股,而要同投行搞場外對賭呢?因為場外對賭的錢輸贏都只係合約雙方輸贏計數喎,除非合約內容另有安排,又或者與之對賭投行本身有權操作那15%的綠鞋額外配股權,否則贏輸對賭的錢以一般ELN的安排,是不會落入郵儲行口袋中。以現在上市公司的披露要求,這些對賭刁的具體內容不為公眾所知,所以真係無從判斷。
 
ELN的特點是升,就本金利息同你計,又或者同投行場外搞掂贖番;跌,一係就埋單計數,再唔係以接貨價勁溝貨。以誠哥跟超級大行的關係,就算真係唔好彩穿了價要埋單計數,都係睇條數點「對」啫,平常大家咁多刁來往,總有方法左對右對去擺平。
 
今次郵儲行上市係一個好的教材,金融市場有名人效應,趙薇啊、翠如BB啊等等。有時細心留意,王敏德和羅霖等都經常出席上市敲鐘,咪又係博有人報道,做好公關。歷史沒有如果,假如當初澳至尊(2031)請得到代言人蔡少芬夫妻落力幫手搞公關,可能就唔使第二次上市了。那陣時國際配售只需要逾1億元,是但搵個專業投資者入一張較大的「飛」已經搞掂,何況唔使實數入錢,間行會提供孖展嘛,又或者三、四個人入中型的飛都已經搞掂,咁簡單都上唔到市,當中應該有一些不為人知的秘密。  
 
作者為兼職上市公司ED(Executive Director),正職係90後廢青、偽文青  
https://www.facebook.com/muddydirtywater
逢周二、四刊出

回首頁      列印

 

/48



C觀點

中原城市領先指數

廚神

旅遊