2016年12月16日

 

金融講ED - 渾水
排斥現金的畸形商業世界

2016年09月13日
  • 大額現金交收或惹銀行注意。(資料圖片)

   

 

有報道指堪輿學家麥玲玲開不到戶口,因為現金大額出入有可疑,甚至被要脅凍結戶口。我笑了,好像麥玲玲這些銀行監管下的受害者何其多,只是因為麥玲玲名氣夠,所以被煲大了。
風水顧問服務以現金交收,是常識,你知我知,其實銀行打電話嘮叨麥玲玲的銀行職員也知,只不過Compliance麻煩,KYC要求多多。為了份工,只好頂硬上。大額現金、開唔到銀行戶口係呢幾年都係商業世界面對的大問題。政黨香港眾志、黃之鋒開唔到滙豐,以為係政治打壓,實際上係因為外資行被美帝當提款機咁罰錢罰到怕,情願少一事,做舊客也不做生客生意。
調番轉,青年新政開到中銀戶口,卻被講成投共,這是缺乏商業常識之故,因為現在地球開戶難度達到十級,而中資開戶尚有一線生機,自然個個中細企仆著去開戶,英國佬唔做生意,仲有中資嘛。不過,前提都係要識個RM,否則都唔係穩開得成。
想起都覺得無奈,如果一個經濟體系排斥現金、拒絕開戶,咁點營運落去?這已經不是普通商業問題,已經是政治問題了。有商會更頂唔順,早前要求政務司長林鄭和金管局介入關注。權在官手,連戶口咁細問題都做唔好,去到上市億億聲的利害關係,如何取信於它?
難怪諮詢文件搞到業界唔信任囉。
去到渾水熟悉的殼股、Corporate finance圈子,一樣遇到排斥現金問題。一般賣殼都要fund proof證明資金來源,現在好多大陸水都有錢,但因為資本管制搬唔到落來,由以前常用的內保外貸到現在的保險操作,交易成本愈搞愈高。就算勉強落到來,又遇到開戶問題。
至於在金融圈的「現金資產公司」更是打壓不少有現金需要的公司集資。參考《上市規則》第14.82和最近的指引信,只要集資後「現金」多過總資產50%,更會被交易所要求停牌。這兒的「現金」不止講到現金,還包括證券、債券及票據等。
這是極不合理,因為做生意有周期,個別公司要度過行業難關,留幾手現金等待投資機會是合理商業決定,咁樣干預一般公司運作去到國際商業,真係俾人笑到面黃。
現金流動是金融世界的命脈,貨幣理論QTM也有提過貨幣流轉速度(Velocity)和經濟增長的關係,連馬克思的經濟思想都有講貨幣的流動本質。水至清則無魚,又要馬兒好,又要馬兒不吃草,哪有這麼矛盾?官僚政客口徑一致說要搞好經濟,見微知著,一葉知秋,不必搞大白象工程搞一帶一路,做好小處已是成功和重要一步了。  作者為兼職上市公司ED(Executive Director),正職係90後廢青、偽文青 
https://www.facebook.com/muddydirtywater

回首頁      列印

 

/64



C觀點

中原城市領先指數

廚神

旅遊