2016年12月16日

 

舊物情尋 - 馮俊鍵
漫遊地球.水壺在手

2016年05月20日
  • 1. 多年證明:紅A產品,係得嘅!
    2. 傳統紅藍,Made in Hong Kong。
    3. 水杯、壺塞、尼龍帶,經典的香港土炮。
    4. 5號PP聚丙烯:熔點高達167度,唯一可以放進微波爐的膠料。但注意有些主體雖以PP製造,但盒蓋則以可能釋放出致癌物的1號「PET聚對苯二甲酸乙二醇脂」製造。

   

 

身體健康,就係財富,知足常樂,人生在於自己而非對方。正所謂「要贏人先要贏自己」,唔理「腦細」佢係乜水、有水定莫水,總之咖啡不只在乎成分,而係在乎情深,唔係又點樣「情深咖啡未曾飲……」

 
白咖啡廣告真係威水,彷彿飲品就只有這一心水。講開水,原來係構成人體的重要成分。佢如「幼滑例湯可潤滑條腸,對眼唔乾叫一目十行」,由吞嚥消化到運送養分,潤滑關節至排泄廢物,降低尿酸又調節體溫,仲可以預防痛風及結石發生。血液、淋巴丶骨骼丶分泌,所以做人點可以缺水咁笨!

 
醒水磅水,整色整水
既然水咁重要,就要讓小學生都知。但舊時並唔係度度地方都有水機龍頭,要飲就要儲起,以便不時之需。儲水就要有水樽,所以自小學開始,返學就隨身攜帶水壺,外觀更要由必需品變成潮物。潮物就係膠物,係由塑膠粒壓製「啤」出而製,正藉香港工業發達,尤其塑膠製品,輕便又堅固,全面取代過去的玻璃和鐵製。
八十年代高層次的小學水壺,外面包有一層熱縮薄膠,多為時下得令的卡通人物,由拯救宇宙到魔法小女孩,或是機械人至識講嘢嘅動物,總之全部都係美日卡通,造型生動!就算無錢買佢哋的原裝產品,都可以攞正牌咁帶佢哋返學,跟出跟入,成班friend子又那怕黃雨突降。由於有薄膠保護,所以全新白色的壺身,原色外露不多。幸而壺口有別色的小水杯如載帽,感覺就似現時樽裝的屈臣氏蒸餾水。如去廁所一樣,男生多用寶藍色和淺藍色,而女生則多為紅色及粉紅色,絕對分黨分派,就算兄妹姊弟也毫不互通。

 
本土威水,製出心水
扭開置頂的水杯,還有一個同要擰開的壺塞,左右設有兩小坑,以便調節倒出水量之餘,更可訓練小肌肉的協調。而為了攜帶方便,壺身亦設有可調節的尼龍帶,方便攜帶。細心了解,原來如此樣子可說是抄襲日系的風格,但究竟有沒有我們香港設計的土炮?
講開塑膠土產,自然想起紅A出品。小時候遇到制水,寶藍色和鮮紅色的水桶,自然養兵千日大派用場。仍記得電視廣告中,有個阿伯用木棍敲打桶底,以證堅硬。不論街市的筲箕、茶餐廳的漏斗形膠凳、家中的賀年全盒及漱口嘜,盡見雙色紅藍。原來六、七十年代,紅A已有小學型水壺,反觀上述所介紹的日本款式,紅A才是原祖。紅色編號為514,結他外形印有音符,藍色517則一般壺型但鑄印花朵,並例明大家都係Made in Hong Kong。

 
一頭霧水,昆水掠水
初小時當然會循規蹈矩,按部就班咁逐一擰開個蓋去飲水。但去到小四、五、六,已經不想那麼麻煩,開始懶威水轉為入手如A5紙大小的輕便型。老套的側帶變為小手帶,冇咗小杯只得小蓋,方便豪飲。而除了輕便外,當時還有獅球嘜送的「大哥大電話」,其天線就是壼蓋。總之目的就係撇去水杯,避免玩包剪揼時被同學踩爛,咁就一世。(親身經歷)
雖然今時今日科技進步,不易碎的戶外形水樽(國內叫大空樽)相當普及,不過記得並非全部都可以盛載熱水,記得睇睇樽底印住邊個回收號碼。研究結論:要買就只買「5」字標誌,不然萬年長用會影響發育和生育,影響命水。所以近年醒水選用日製的保溫壼,因為就算防火布料都有唔同規格,更何況冇牌子的產品昆水印乜數字都得,個個吹水都話可以高溫。最後記得外婆教落,清潔只需一小匙生米去Chok,既方便又快捷!本文尾水,大家散水!

馮俊鍵~興趣多而尋究底,愛藏物並擁思人。七十後,舊情尋。電郵:[email protected]
 

回首頁      列印

 

/108



C觀點

中原城市領先指數

廚神

旅遊