2016年12月16日

 

浪漫月巴睇90s - 月巴氏
今夜像霧像雨又像風,不妨卿卿我我~

2016年04月22日
  • 中學時的我是卿卿迷。阿sir和摵時當然唔知我呢一份迷。

  • 中學時的我是卿卿迷。阿sir和摵時當然唔知我呢一份迷。

  • 林帆一首《今夜》,90年代一個重要回憶。

  • 林帆一首《今夜》,90年代一個重要回憶。

  • 娘咩?我覺得張相OK靚喎——而家有啲碟啲封套咪仲娘。

  • 呢隻我真係爭啲買咗,點知一拎起隻碟時突然撞見同學呀頂!

  • 呢隻我曾經好想買,無奈實在懼怕世俗——即唱片舖staff的目光。

   

 

現在,為了慳錢,更高層需要漏夜炒一個高層;90年代,唱片公司為了宣傳自己的歌,可以向電視台買一個晚間時段狂播自己的歌。
1.因為這個時段(也因為我當年仲有持續地開電視),我識唱一首歌。
2.今夜的星光燦爛,那半醉一雙眼,透過了友誼界限……
3.林帆《今夜》。一首你明明冇買碟但都應該識得哼頭幾句的歌——唔只識唱,甚或仲好記得個MV:某夜,隆重地著上冷衫的林帆,在一個沙灘緩緩步行,離奇是沙灘上早就布下了一個由唔知邊個布下的blur blur哋燈光陣(blur是鏡頭效果),而更離奇是,鏡頭突然閃出一條友,著住件tee,恍如體操選手般過度活躍地跳嚟跳去再打埋斛斗,看得(著住冷衫的)林帆好不興奮,而更更離奇是,這時林帆竟然坐在一張相當歐陸味的床上——Who擺這麼一張床在沙灘上?唔重要,重要是一班幕後創作人為了營造「今夜的星光燦爛那半醉一雙眼透過了友誼界限」這淒美意境,真的苦心孤詣地,做咗好多嘢,擺咗好多props,也應該使咗公司唔少錢……

 
4.但真正使錢的是,一間唱片公司為了推廣旗下歌手,是可以向電視台買一個時段,晚晚播幾首歌,持之以恆地播播播播播播播播播到我事隔多年依然識得唱《今夜》,兼背得出個MV。
5.那間唱片公司是飛圖,只是我們大部分人都慣咗口叫佢「飛圖卡拉OK」——在那個未有電腦揀歌再幫你換埋碟的年代(而是有個膠file,攝滿歌紙,你想唱邊首,就唔該根據歌紙去攞相對應的LD,所以不是揀歌唱,而是揀碟唱,為慳時間惟有成隻碟唱晒),我們去唱K(當時會好隆而重之地講「去唱卡拉OK」,恍如沒有「卡拉」,成件事就冇咁OK),走唔甩,一定唱過飛圖卡拉OK之出品。
6.我尤其欣賞那些為拍而拍的MV。A歌手明明不是飛圖門下,飛圖為了製作A歌手某首作品的卡拉OK版,是會專誠請幾名model仔或演員仔(有些在好多年後真的紅咗),專誠拍一個MV,MV仲會盡量嘗試配合歌詞內容,從中你會看見一種近乎偏執的認真……也有一些,冇人的——嚴格來說應該是冇一個特定的人,因為成個MV就是齋拍世界各地美景,讓你唱歌之餘眼睛想旅行,一首MV,N種感受。

 
7.然後,飛圖也有屬於自己的歌手。例如梁雁翎。有一個秘密,咁多年我都冇話俾同學和老師知——我.愛.梁.雁.翎!我由衷地覺得梁雁翎好靚!OK你可以話佢娘,但「靚」和「娘」,是兩種不相關而又可以並存的性質,一個人自然可以靚得來完全唔娘,但娘,同樣也掩蓋不了一個人的靚……但當年的我未讀過亞里士多德,不知道以上道理,以致當同學們話佢娘時,我只能(揞住良心)附和……現在不同了,我已經唔使理班同學,可以大聲講:梁雁翎好靚呀!《像霧像雨又像風》好好聽呀!《你怎麼說》仲好聽啊!同蔡濟文合唱的《慢慢地陪著你走》亦好動人呀(當年我幾咁想邀請女同學L跟我合唱,無奈一直不敢開口……)!
8.當然,還有卿卿。她真的能夠用聲音,演繹出一種唔係你話扮就扮到的性感淒怨&風情;當大家只記得她的《擋不住的風情》,《卿卿我我》才是我的卿卿首選。
9.Yes,這就是90年代初的香港樂壇。你可以去迷天王天后,可以去愛純情玉女,可以去捧位置二三線但歌藝相當一級的男歌手,也可以好似我咁,晚晚臨近午夜開電視聽卿卿林帆梁雁翎(而又唔使話俾同學知)——你有得揀,因為真係有得俾你揀。
10.為求懶係首尾呼應,且讓我用《今夜》副歌作結:今宵方知往日孤單,期求明晨夢幻不散,過去欠你現在奉還~


90年代,可能是我們最後的快樂時代。
撰文:月巴氏
facebook: https://www.facebook.com/fatmoonba
blog: http://fatmoonba.blogspot.com/
email: fatmoonba@yahoo.com.hk


 

回首頁      列印

 

/96



C觀點

中原城市領先指數

廚神

旅遊