2016年12月16日

 

飲食事典 - 阿鼻
負皮的妙用

2015年07月31日
   

 

「口碑」這東西,以往都是頗為虛幻的,只要店東喜歡,都可以說自己的店「有口皆碑」。
現在可不是這種玩法,大量的搵食網加上social media,人人皆可評分俾rate,公司、店子的口碑直接變成可量化的分數或星星──明明得1星你都夠膽話自己有口碑?全港應該只得明將達到過此神境(編按:明將各店在Openrice最低評分為2.1星,作者請勿冤枉名店)。
這種玩法也帶來了「正評/負評」的風氣。以前經常會看到客人跟侍應/經理嘈交,斯文如家父也試過拍枱鬧部長上菜超慢;今日今時這場面難得一見了,啲嘢凍/啲嘢未熟/上菜慢/濫收茶芥嗎?不是消委會見,是FB見;當場我忍下這口氣,晏啲就請你食「負皮」。
食肆當然不會樂見專頁上人人都說「負皮是我俾的」,不過有時做人醒少少,還是能夠把乾坤來扭轉:墨爾本有家酒吧近日就拿自己在Urbanspoon的負皮來賣廣告,居然頗有效果。Urbanspoon是個北美+澳洲的食店資料庫,食客幫襯後可以上載圖片、寫評語、評分,玩法跟我們的Openrice無異(編按:Urbanspoon已在今年6月摺埋)。這家墨爾本酒吧The Nevermind Bar果真never mind,逆向地利用客人給的網上負皮印成海報(圖),這些負皮包括「名過其實」、「啤酒太凍」、「BBQ賣晒」、「都冇位嘅」、「好心個bartender剃下鬚啦!」等等,最後的tagline,是「嚟睇下點解有7%客人唔like我哋」。
哦,即係佢哋有93%「正皮」,其實都幾高分囉。
所以說到底,負皮不是人人玩得起。情況就如美女醜化自己,我們會說「大膽!有guts!」、而醜女醜化自己,我們則會說「為何放棄治療?」


微博 t.sina.com.cn/nosechoy
並請在FB搜尋「阿鼻的飲食字典」並於10秒內按Like

回首頁      列印

 

/100



C觀點

中原城市領先指數

廚神

旅遊