2016年12月16日

 

真假政經 - 王慧麟
撬票咗未?

2015年02月12日
   

 

人生嘅嘢,總會有驚喜。例如話,如果普選的話,某某就唔會有機會連任。呢句表面好有道理,但係信嗰個,可能真係需要睇多些人和事。上個月27日,有報紙報道話,我地嘅政府,慷慨到一個地步,就係考慮將來老人免費搭車。

聽完之後,你會唔會譁然?我問一位退休高官,佢第一句就話:我地呢班嬰兒潮嘅一代,真係連退咗休都不斷搵下一代著數,無陰功。我聽完心都戚戚然。假如真係如政府官員講,搭綠巴兩蚊實施一年之後,會檢討係唔係免費搭車,即係最快2016年會有免費搭車之proposal出嚟,嘩!如果我係老人家,2017年又有普選的話,呢一票畀硬嗰位要連任嘅領導啦!邊個話佢連任會輸?贏到開巷啦,香港後生仔唔做選民,中坑扮高貴嫌乜嘢政治好污穢唔去掂,最後就由鐵桿老人票將佢送入連任之寶座──仲要用你同我納稅嘅錢,哈哈!老友!福利唔怕派,用你銀包嘅袋派就得啦,派你錢,我連任,普選?

所以,如果普選都係為咗嗰位有能之士連任鋪路的話,咁樣,泛民朋友響是否支持政改方面,應該要多幾重思考。依家呢個人,已經恢宏大量到一個以見神殺神,見佛殺佛之手法處理政治問題,無懼自己民望低以及立法會之阻撓,一於同泛民戰鬥到底,如此政治手腕,如果畀佢響2017年「普選」成功,你估泛民會有好日子過咩?

因此,清醒嘅泛民朋友,以未來社會大局為重嘅,當然會反對袋住先,而且一定會反對到底。遇到佢地政黨內部,有一啲所謂「溫和派」,要求袋住先之聲音,一於壓住唔畀呢啲聲音成為主流。因為呢班朋友,知道袋住先若果通過,後患無窮,2016年之立法會選舉,除非建制派收到上面指示,唔去追殺某啲泛民候選人,放佢一馬,否則泛民必然輸到無朋友。為咗要反對到底,更要用到辭職公投來顯示決心。坦白講,對呢班人嚟講,做人做到六十,有乜嘢重要得過,將社會前途放響個人榮辱之上呢?

但係,你同我,同呢啲咁有抱負嘅人,最大分別就係道德同願景之支持。舉例,一個小小嘅政客,佢嘅考慮係唔係咁有遠見之將來,而係組織發展嘅未來,又或者係個人發展之未來,又或者係金主之利益,咁樣考慮就唔同。響依家的政治氣候,佢地知道,如果唔係上面仁慈,唔重手打死佢地,佢地之組織或個人,早就收得工。

呢個情況,佔中前係咁樣,佔中後呢,其實都無變過。反而,佔中之後,部分人更覺得,北方咁強硬,一隻手指都畀佢地捽死,硬撼無意義。老友A話,只係欠些少可以畀泛民轉身之地方,如果依家投票,其實都有機會通過。哈哈!

佔中,只係delay咗個情況。

回首頁      列印

 

/80



C觀點

中原城市領先指數

廚神

旅遊