2016年12月16日

 

真假政經 - 王慧麟
教學真義

2015年02月06日
   

 

昨日提到,英國佬點樣管殖民地,一早就走向細緻化。今年我響課程之中,決定以導讀形式,同學生一齊探討,殖民主義的三碌支柱。第一碌係間接管治,噚日已經講完。
第二碌,就係殖民主義的行政管理。公共行政呢門手藝,係二次大戰之後先至慢慢興盛,後來至成為日常語言。當然,在此之前,一樣有對政府制度化及科學化之研究,但情況唔太普遍。主要原因,係好多現化之公共行政體系,要響二之大戰之前,先至確立得到。
就好似殖民地之行政管理,究竟係由倫敦指落去殖民地管理,定係全權交由殖民地負責,當中係中央化定係去中央化,邊啲政策需要中央化,邊啲政策要地區化,係一種藝術。另一方面,當倫敦政令要落實之時,點樣將政令去到帝國最前線,確係一個考驗。
響二十年代開始,英國接收了戰敗德國交畀佢地之殖民地後,各地高端及專業人才荒,更為嚴重。殖民地響當地,幾乎都請唔到專家,去倫敦又請唔到猛人,確係頭痕。就響呢個時候,殖民地部有識之士Ralph Furse就大膽改革,響倫敦訂立新公僕體制,招聘一堆不同專業及行政管理之職系人員,陸續受訓及派駐殖民地,由農業、衛生到政務都有,受訓完之後就會成為當地高端管理人才。咁樣,佢地呢堆like-minded嘅殖民地官員,同倫敦遙距地同聲同氣,倫敦若有重要政令,要落到殖民地實處,就容易及暢順得多。
第三碌就係經濟發展。二次大戰後,英帝窮,為咗救自己,於是想到,不如響殖民地搞經濟發展項目,既可以推動殖民地經濟發展,又可以借此,生產貨品或原材料出口返自己宗主國,一箭雙鵰。點知,呢啲由上而下,一廂情願之經濟發展操作,梗係搞到一扑一碌,蝕到唔三唔四,最後都係無疾而終。呢樣嘢其實係側面反映到,殖民地部訓練出來做官嘅人,搞管理得心應手,搞經濟就雞手鴨腳。呢個莫非就係殖民地官僚體制訓練出來之官員嘅特點呢?我唔知啦。
讀完呢三碌,大體都應該理解,乜嘢叫做帝國的指尖:即係一個帝國管治的微觀考察。教書唔係教管治。教書只係會點出一啲學術上值得注意的知識,但唔係代表讀完書就可以識得管治。紙上談兵,可以咁講。如果學者可以識管治,全地球嘅總統總理或首相,甚至係管治團隊,就交畀當地嘅大學教授互選就得啦,係未?
有學生問到,好想課後多些討論。我真係好慚愧。漂流老師,無固定辦公室,無定時之面見時間,無好多行政支援,通常講完書就想返屋企。至於有學生問到,點解唔將課堂之東西,公開響public domain講?唔好意思,寫稿要有稿費,學嘢就要畀錢,天經地義。想學殖民主義三碌柱之奧義?哈哈!你知點啦,報名請早。但係,下學年仲唔知係唔係我教噃……(二之二)

回首頁      列印

 

/128



C觀點

中原城市領先指數

廚神

旅遊