2016年12月16日

 

真假政經 - 王慧麟
教學奧義

2015年02月05日
   

 

賺奶粉錢,真係唔容易。香港係金融中心,即係話,任何同金融無關嘅嘢,搵錢能力會差啲。公餘時候,筆者可以搵嘅,就係響大學教吓書,荼毒青年。
講到呢度,真係多謝好多朋友支持,至少每年都可以響大學教吓書。我呢類飄流老師就似無腳嘅雀仔。我曾經響九龍塘嘅大學落腳,最近呢年就響沙田。教嘅東西包羅萬有,好大程度係同我返工,即係傳媒嘅工作關係大啲,公共行政都有教,但係就從來冇響香港教過我老本行,即係法律。哈哈!證明香港法律教育人才濟濟,幾時輪到嗰啲無厘頭人士響報紙就說三道四批評母校呢?
我教嘅科目,自由度相當大,教得過癮,足證學術自由之重要。今年教咗兩個唔同學系,響劉教授支持下,教咗科「法律與社會」,相當有挑戰性,因為學生固然上足堂,連其他冇修呢科嘅同學都上課,一班恒常都有五六十人,真係太多人,要用番大班授課式上堂,唔係幾啱我嘅互動式教法。結果為咗問學生問題,要響課室上走來走去,猶記得舊年教書時,學生評語係,唔鍾意老師響課室內行來行去。死未?
說回正題。今個學期,得沈大師支持,講非洲政治經濟學,響課程裡面我就大改,只係教「殖民主義」, 過往之經驗係,如果只係響七個星期裡面,講大理論及大歷史,學生上堂好就似上興趣班咁樣,兩手空空來,上堂玩facebook,落堂忘記了,只係交功課讀一讀個功課readings就算數。當然,讀唔讀書,讀幾多,吸收幾多,係學生之責任,但係,碩士學生讀書之心態,如同去社區中心學倉頡打字,似乎老師都應該有責任。
於是,今期決定用導讀的方式去教,希望響七個星期之課程中,迫到十幾個學生,真正瞓身,細讀殖民主義有關的三個主題。呢三個主題,亦係我響研讀殖民主義方面,覺得係最精要的地方。三個主題查實係理解殖民主義的幾碌大柱。第一碌,就係「間接管治」。我希望學生先從十九世紀,一些主要評論家,如何理解「帝國開始」,然後就因為英國佬要響非洲,以最少嘅人手,管最多的地同人口,於是就有「間接管治」。我就要求學生,研讀Lord Lugard的經典,The Dual Mandate of British Tropical Africa 的選章,唔用第二或三手的作者,直接去理解乜嘢係間接管治。
然後我亦請學生去讀一些當時非洲殖民地官員,寫畀上司嘅便箋,講述一下間接管治,響佢地地方殖民地專員之理解,同埋日常運作出現的問題及處理方法。咁樣,學生就可以進一步了解,當倫敦殖民地要全面推動間接管治的時候,非洲地區一個省之官員,係點樣落實。換言之,帝國的政令,點樣去到非洲之一條村落呢?咁樣就可以更理解,帝國係點樣運作。(二之一)

回首頁      列印

 

/64



C觀點

中原城市領先指數

廚神

旅遊