2016年12月16日

 

我的選擇 - 何駿傑
新界西一日食記

2012年11月09日
  • 芥辣焗豬手帶微微芥辣香,豬手雖肥,不太膩。($198)

  • 炸魚薯條($82) ,分量頗多,脆口,可以一試。香草香他他醬,配魚柳真一流!

  • 金壘餐廳:元朗八鄉石崗上村DD114號
     電話:2488 1642

  • 極入味的牛腩,軟腍的翼尖,好食。三餸「嗱喳麵」($26)

  • 小店淺窄,多人光顧,難搵位。

  • 唐記粉麵小食:屯門鄉事會路94-110康利中心25A 
     電話:2459 6683

   

 

秋高氣爽,有時候到新界散步,比留在市區令我身心暢快。有朋友指我曾介紹過元朗及大澳幾次,是不是沒有其他地方作好介紹,故今次我們去屯門及錦田,兩區同是在元朗附近,把三地食玩串連,定不會浪費秋日好時光。
早上先到屯門走走,我平日較少到這區,幸得有班屯門老友介紹去食巷仔「嗱喳麵」。「嗱喳麵」即是車仔麵,「嗱喳」是形容以前在街邊食麵,食材及食具好像不太衛生,但我獨愛此風味,在酒店食蛋糕反而令我周身不舒服!啊!小店地方淺窄,我又不嫌排隊,只為吃牛腩及雞翼尖。一入門已聞到強烈的牛腩濃香。這裡的柱侯牛腩腍得來不是死腍,入味,不太鹹,不黐牙,有很香的薑味及陳皮味,雖不是燜得軟香腍滑,但那啖陳年腩汁已值回票價。
食「嗱喳麵」,我很少叫雞翼尖,因我只會食下環榮記的翼尖,但看見食客多叫便試試,一吮,骨肉分離,有豉香、酒香,完全辟走討厭的雪臭味,有榮記的八成水準,好食!我食「嗱喳麵」必叫粗麵,覺份量多一些,腩汁的濃香掩蓋了鹼水味,但奇怪是小店沒有咖喱汁或沙嗲汁供應,若有定必更惹味。食完麵到市內走走,後到元朗舊墟懷緬昔日時光,看看天色漸昏暗,記得在幾年前去過錦田食晚飯,今日又可回味。
搭54號巴士到上村總站落車,行幾步便到金壘餐廳,微微清風,坐在户外吃著名物芥辣焗豬手,加碟炸魚薯條,確是寫意。食豬手多是黑椒焗,用芥辣焗又是另一番味道,用辣味稍濃的英式芥辣焗,只用少少力已可把豬手切開,肉香四溢,肥瘦甘美,辣味不濃,但食得多較膩口,碟底的酸菜及配菜有解膩之用,不要浪費。炸魚薯條是普通之物,但那碟自製他他醬卻是好味之選,有絲絲香草香味,魚柳及薯條也是即叫即炸,保證脆口。你會問兩人食兩碟足夠嗎?兩碟足以令我們飽肚。
看過今回的介紹後,請朋友不要說我只懂去元朗食嘢,新界西還剩下葵青區沒有留下太多足跡,定要趁著好天氣下細心發掘,而各位朋友亦要好好享受一下,好天氣的日子不多,難道喜歡在黃梅天才去散步嗎?
 

四處搵食,尤喜懷舊食物,愛好下廚,搵人做白老鼠。

回首頁      列印

 

/96



C觀點

中原城市領先指數

廚神

旅遊