2016年12月16日

真.偽人 偽.女神 盤菜瑩子

2016年06月24日
全部 > 娛樂
  • 真.偽人 偽.女神 盤菜瑩子

  • 真.偽人 偽.女神 盤菜瑩子

  • 真.偽人 偽.女神 盤菜瑩子

  • 真.偽人 偽.女神 盤菜瑩子

  • 真.偽人 偽.女神 盤菜瑩子

  • 盤菜早前成為日本健康飲品代言人,首次在攝影棚堅‧拍廣告。

    盤菜早前成為日本健康飲品代言人,首次在攝影棚堅‧拍廣告。

  • 真.偽人 偽.女神 盤菜瑩子

  • 盤菜與東方昇時常合作,默契十足。

    盤菜與東方昇時常合作,默契十足。

  • 盤菜去年處女登場,被宅男cap圖是常識吧。

    盤菜去年處女登場,被宅男cap圖是常識吧。

  • 身為樂團主音,盤菜去年把神曲《愈癌愈愛》唱到街知巷聞。

    身為樂團主音,盤菜去年把神曲《愈癌愈愛》唱到街知巷聞。

   

 

昔日的娛樂圈是個以貌取人的時代,但這個年頭,藝人、影星不但只有娛樂大眾功能,更擁有改變社會作用。事關網絡世界改變娛圈生態後,他們不再受公仔箱框框所局限,既可活得更貼地、更有血有肉,更可揭開面具關心社會,成功者則為之「女神」;但「神」從來不易當,一場如同用民智作籌碼的賭局,將自身命運、前途付託大眾,輸了便失掉挖金良機,贏了卻喚醒裝睡一群,相信由毛記主播升呢為「偽人界」女神的盤菜瑩子,早就深明當中利害。
文:林穎嵐(Wing)  圖:陳奕釗


喺毛記做嘢真係好開心,我開始明白佢哋嘅做事方式,例如平日睇到嘅片只有3分鐘,其實要拍足成日甚至幾日,我哋睇到以為好hea嘅內容,其實同事落足200分精神去做……


愛日本文化
嬉笑怒罵談時政,過去是《頭條新聞》的專利,今時今日,毛記電視已成一員,而節目《六點半左右新聞報道》更令一群偽主播成為網絡紅人,當中的呃like王自然是二創版盤翠瑩的盤菜瑩子。這位年僅23歲的小妮子,原名柯翠婷,一頭金色短髮配上臉頰的小酒窩,日系女神形象深入民心,她指,這個入屋形象是《100毛》腦細s(林日曦、陳強、阿Bu)贈她的入行「大禮」,「唔好睇佢哋成日講笑,其實每落一個決定都經過深思熟慮,每位主播,由個名以至造型都係佢哋諗爆頭諗出嚟。」盤菜興奮地指,上周六是盤菜瑩子誕生一周年,她之所以牢牢記著這個「偽」名的生日,全因其由來跟她本人甚有淵緣。畢業於城市大學、主修日文系的她,坦言對日本文化很感興趣,更曾經遠赴日本工作,「一路都好鍾意日本嘅動漫,當時只係諗,如果可以唔止睇日劇學日文,可以正正式式學識嘅話,對我唱日文歌都有幫助,而去日本工作,係因為畢業之後有間日本公司請咗我,學吓點樣管理同經營一家公司,不過,一年後就返咗嚟香港。」


認真地Hea
在日本當過侍應,學過管理,盤菜坦言,以往所學跟現時的工作全無關係,形容到毛記見工從沒經過周詳考慮,更遑論有志擔任主播一職,「之前從事文書工作,突然間想轉換吓環境,就去毛記電視面試臨時演員,入職冇耐,公司唔夠人手就開始幫手拍片,後來就轉咗全職,仲做埋主播。」在《100毛》工作,大概是現在最搶手筍工之一,而面試過程便成了盤菜最常(被要求)分享的經歷,「一見工就見3個腦細s,佢哋問我有咩特殊技能,我咪答識講日文囉,之後佢問我學日文有咩用等等。(聽講你喺份CV度寫自己唔係靚女?)下,你又知嘅?係啊!我記得我係寫『鮮花都要有綠葉襯托,況且依家有圖都冇真相,不如你見吓我啦』咁囉。」在正式展開毛記電視工作生涯後,盤菜認為,工作內容偶然與預期有所出入,但亦因為這些意外經歷,令她從中找到快樂,「喺毛記做嘢真係好開心,我開始明白佢哋嘅做事方式,例如平日睇到嘅片只有3分鐘,其實要拍足成日甚至幾日,我哋睇到以為好hea嘅內容,其實同事落足200分精神去做,喺度做嘢的確會有壓力(唔係因為腦細s黑面),因為大家都好有要求,有時淨係喺鏡頭前面行過,都要拍幾十個take,拍一段《六點半左右新聞報道》,負責度稿嗰啲人,朝早8點已經返嚟開始寫,到下午兩至三點都仲寫緊,連埋我哋出去拍完、剪完,整完晒已經夜晚11點幾,等到第二日6點幾播出,搞足成日。」


笑談悲劇
「全力以赴 毛牌仲好」是毛記電視的口號,而事實上,在沒有免費電視台牌照的規範下,其影響力的確比有牌電視高。據盤菜所講,毛記的新聞報道稿由腦細s訂題目,再由同事撰稿,主播的職責按理只是跟稿讀,但她笑言,毛記主播各具特色,一個字以至一個語氣都是精粹,「啲稿嚟到我哋度通常都可以照稿讀,但我哋可以提出意見,例如加啲語氣咁,我通常會加啲日文落去,又或者喺錄之前問下導演,可唔可以報報下大嗌等,有時加少少個人啲嘅嘢入去,仲可以inspire到後製。有次我大嗌完,佢哋就key咗鄭嘉穎個頭落去,畫面豐富啲,又好笑啲。」具個人特色、有fans、有個人專頁,日前更成為日本健康飲品品牌代言人,作為人氣主播兼網絡紅人,盤菜顯然已是公眾人物,但與其說她是藝人,她更希望被定位為新聞工作者,「藝人應該要帶俾人歡樂,但毛記主播嘅責任絕對唔係娛樂大眾,而係每日挖新聞,用一個好似好開心、好生動嘅方式去報道,聽落好笑,但事實係,我哋講緊一啲好荒謬嘅社會現實,希望呢種方式可以令更多人願意去了解香港發生緊咩事,即使只有一、兩個人睇完,覺醒咗,我哋都已經好欣慰。」


Like數不等於一切
正如盤菜所言,小公司人手不足,在毛記工作不如外人所想般輕鬆,兼任admin和主播的她,自然每天都分身不暇,「除咗拍片,我最重要嘅工作係admin,即係公司阿姐做嘅嘢(笑),採購文具、零食同水等,呢個工作好重要,呢間公司冇人做其他嘢都得,但冇人買零食同杯麵,呢度應該會暴動。(咁紅都要做呢啲嘢?)我好紅咩?真係唔覺喎。」盤菜瑩子的Facebook專頁多達10萬人like,說她是人氣最強的女主播實在不為過,但對她而言,似乎like數再多都不足以反映「事實」,「其實每個主播都有特色,有自己fans,每個人都為呢份工作付出咗好大努力,好似東方昇咁,佢其實好有主見,有時一齊拍嘢仲會鬧交,而且佢工作好努力,好似之前為台慶show準備,佢負責表演魔術,表演前一排,有時我哋好夜收工,佢會拎一疊書嚟叫我抽,抽完佢又走番入房,再出嚟又叫我抽,原來佢練緊叫人抽書嗰一part,淨係一個細節都練咗幾個月。」提到其他主播,盤菜笑言自己比他們懶惰得多,「我都冇為台慶show特別準備啲咩,我表演大嗌嘛,最多咪閂埋門關自己喺房狂嗌,就算平時都係背稿,同佢哋比真係差得遠。好似黃慘盈咁,佢台慶表演跳舞,仲跳到喊,其實佢真係好驚跳舞,而且出嚟效果好好,我好欣賞佢哋每一個,就算要做啲自己本身好驚嘅嘢都頂硬上,我自問就唔得。」


盤菜與我
盤菜形容,她是眾主播中最幸運的一位,事關每個角色都似乎跟本人有點出入,而且在幾乎取代了「真人」的形象下,他們的工作和私生活早已「混為一談」,「至少我唔使好似東方昇咁打簡體字,唔使好似黃慘盈咁勁喊,當然啦,我覺得輕鬆,係因為我哋嘅角色,都係老闆經過觀察後設計,例如慘盈本身就係個好眼淺嘅人,好容易感動,好容易傷心,好情緒化,所以要我做佢其實好難。」當然,本人與藝名之間被畫上等號,盤菜亦不能倖免,然而角色與她卻無大差別,令她無論在哪個身份都能自由自在做自己,「我不嬲都係好嘈嘅人,喺同事或者老闆眼中都唔係啲咩靚女,同喺鏡頭前一樣都係唔癲唔喪,好活躍。」雖然她自言兩者無大衝突,但盤菜的知名度愈高,所帶來的衝突便愈大,「之前俾人起底,其實真係冇咩心理準備,對我嚟講,主播都只係返一份全職工作,無端端俾人當明星咁查背景,心理上好難調節。嗰刻係有啲唔開心,可能因為我嘅朋友都知道我以前嘅事,所以直覺覺得係俾人出賣。不過依家諗番轉頭,俾大家認識真正嘅我未嘗唔係好事,雖然依家有人叫我柯小姐係有啲難頂,但其實啲記者係幫咗我,至少幾十年之後,大家會記得我係盤菜瑩子呢個角色背後嘅admin,而且大家嘅評價都算係正面,既幫咗我,亦幫咗腦細s啦。」

回首頁      列印

 

 

/120



C觀點

中原城市領先指數

廚神

旅遊